Civatên Aştiyê yên Amedê ku bi pêşengiya Şaredariya Bajarê Mezin a Amedê tên lidarxistin, di rûniştina xwe ya pêncemîn de nûnerên dîn û baweriyên cihêreng dicivîne da ku rola wan a di avakirina aştiyê de were nîqaşkirin.

Bernameya ku ji aliyê Şaredariya Bajarê Mezin a Amedê ve tê organîzekirin, berdewam dike. Berê di bin sernavên cuda de gelek aliyên aştiya civakî hatibûn nirxandin; rûniştina pêncemîn jî dê bi temaya “Di Avakirina Aştiyê de Dîn û Bawerî” pêk bê.

Bername dê di 22ê Sibatê roja Yekşemê de, di navbera saet 15.00-17.00an de, li Navenda Çand û Kongreyê ya Çand Amedê bê kirin. Di vê çalakiyê de, nûnerên civakên baweriyê yên cuda dê werin cem hev û nêzîkatiyên xwe yên li ser têgeha aştiyê û beşdariya baweriyan a di hûnandina aştiya civakî de binirxînin.

Nûnerên baweriyên cuda dê biaxivin

Di bernameyê de ev kes wekî axiver cih digirin: Ji Kongreya Îslama Demokratîk Dîlan Aydin, ji Komeleyên Elewiyan ên Demokratîk Fethiye Yildirim, ji civaka Êzidî Hikmet Yuksel û ji Dêra Protestan a Ermenî Ender Peker.

Di hevdîtinê de, perspektîfên hevpar ên pergalên ol û baweriyê yên li ser têgeha aştiyê, nirxên exlaqî û beşdariya wan a ji bo çanda jiyana hevbeş dê werin bidestgirtin. Her wiha hevdîtin ji bo beşdariya welatiyan vekirî ye.

Ji bo aştiya civakî nêzîkatiyeke piralî

Civatên Aştiyê yên Amedê, wekî rêzeçalakiyên ku armanca wan xurtkirina diyaloga civakî û çanda jiyana hevpar a li Amedê ye tên plankirin. Di hevdîtinên berê de aliyên aştiyê yên civakî, çandî û siyasî hatibûn nîqaşkirin; akademîsyen, nûnerên saziyên sivîl û welatî hatibûn cem hev.

Di hevdîtina pêncemîn de jî dê bal were kişandin ser rola baweriyan a di avakirina aştiyê de û derfetên lihevhatina nasname û girêdayiyên cuda yên li dora nirxên hevpar dê werin nirxandin.