Hemşaredarê Amedî Şaristanê Girdî Serra Bucak û Dogan Hatun, çarçewaya kombîyayîşanê heftane yê personelan de Serekîya Daîreya Resî de kedkaranê ke kar kenê, înan reyde ameyî têhet.

Kombîyayîşî de, şertê karî yê personelan û pêşnîyazê çareserîye yê problemanê resî yê şaristanî ameyî munaqeşakerdene.

'Notê ke ma girewtî, rayîrê ma akenê"

Hemşaredara Amedî ya Şaristanê Girdî Bucak îfade kerd ke ê zanê ke res warêko zehmet o û va: "Wexto ke ma ameyî wezîfeyî ser o, 8 serranê peyênan de warê resî de tahribatî û kêmayê sermîyangozarîye bîyî. Notê ke ma gênê, rayîrê ma roşn kenê."

'Ganî ma pîya çareser bikerê'

Hemşaredarê Amedî yê Şaristanê Girdî Dogan Hatunî zî şoforan rê qisey kerd û va: "Demê qeyûmî pey de mend. Fîloya otobusan ra heta şoforan, ma bi hawayêko pak û raşt ganî xizmetê şarî bikerê. Problemanê xo ma pîya ganî safî bikê."