Şaredarîya Amedî ya Şaristanê Girdî, seba 8ê Adare Roja Cinîyanê Kedkaran a Dinya do aktîvîteyê tewir-tewirAN organîze bikero. Koroya Cinîyan ke personelanê cinîyan ê şaredarîye ra pê ameya zî, do 28ê Sibate de reya verêne vejîyo sahne ser.

Şaredarîya Şaristanê Girdî de aktîvîteyanê 8ê Adare Roja Cinîyanê Kedkaran a Dinya 21ê Sibate de dest pêkerd. Serekîya Daîreya Xizmetê Cinî û Keyeyî, heta 8ê Adare rêzêk aktîvîteyan organîze kena. Bi aktîvîteyan yeno waştene ke piştîdayîşê cinîyan xurt bibo û hîsdarîye bêro meydan.

Goreyê programî, do taxe û merkezan de têhetameyîşê cinîyan, kordînebîyayîşê seba maçê Amedsporî û qeydê Passolîgî, temaşekerdişê fîlm û tîyatroyî û zîyaretê kargeh û fabrîkayan ke tede cinî xebitîyenê, organîze bibê. Koroya Cinîyan ke xebatanê xo dewam kena zî do 28ê Sibate saete 14:00 de Merkezê Kultur û Kongre yê Çand Amedî de reya verêne bi konserî vejîyo sehne ser.