Hemşaredarê Şaredarîya Amedî ya Şaristanê Girdî Serra Bucak û Dogan Hatunî ke serweşîya Cagirê Serekê Meclîsî û Parlamenterê Îstanbulî yê DEM Partî Sirrî Sureyya Onderî qebul kerd, dîyar kerd ke ê do wayîrîya têkoşînê Onderî bikê ke emrê xo seba aştîya şaran feda kerd.

Awanîya Rêxistina Şaristanî ya Amedî ya Partîya Seypêyî û Demokrasî ya Şaran (DEM Partî) de, seba Sirrî Sureyya Onder ke 3ê Gulane nexweşxane de ke tede tedawî dîyêne, cuya xo vîndî kerd, serweşîye ameye viraştene. Serweşîye de Hemşaredarê ma Serra Bucak û Dogan Hatunî reyde temsîlkarê partîyanê sîyasîyan û rêxistinanê komelê sivîlî, endamê meclîsî û şar beşdar bîyî.

Hemşaredar Hatunî qiseyê xo de qeyd kerd ke "Birayê Sirri, heme emrê xo seba aştîya heme şaran feda kerd. Mîraso ke ma rê mendo, sey beşdarîya şima ya ewroyêne, wayîrvejîyayîşê mîrasê ey çîyo tewr pîroz o." Hatunî va "No têkoşîn sey bayraq a, înan na bayraqe heta cayêk ard, girewtişê na bayraqe wezîfeyê ma yo. Ma bayraqe erd nêverdanê. Bêhêvî memanê. Ma do wayîrîya bayraqa ey bikê û ma do nêverdê ke dayîkê ma bêhêvî bimanê."

Hemşaredare Bucak zî dîyar kerd ke mucadeleyê Onderî do erd de nêmano û va: "No têkoşîn heta ke aştî, demokrasî û azadî bêrê nê erdan, do bibo pîl. Vîrardişê ey do rayîrê ma roşn bikero."