Serekîya Daîreya Karê Afatan seba ke beşdarê xebatanê cîgêrayîş-xelaskerdişî yê afatanê mumkinan bibo, çarçewaya protokolî de ke AFAD'î reyde îmza bîyo, dest bi Perwerdeyê Akredîtasyonê Cîgêrayîş-Xelaskerdişî kerd. 

Perwerdeyan de afate, şinasnayîşê bingeyinî yê afatan, terzê hereketî yê halê acîlan de û şuxulnayîşê malzemeyanê teknîkan ê operasyonanê xelaskerdişî bi hawayêko pratîk yenê îzahkerdene.

Perwerdeyê akredîtasyonê cîgêrayîş-xelaskerdişî do 3 hewte dewam biko û perwerdeyê hîsîyarîya afatan do 3 rojî dewam biko. Badê ey personelê ke serkewte bîyî do sertîfîka bigîrê û do afatanê muhtemelan de bi koordinasyonê AFAD'î wezîfe bigîrê.

Serekê Daîreya Karê Afatan Azat Yilmazî va ke ê ekîbêko 35 personelan reyde perwerde gênê û va: "Bi saya perwerdeyî, afatêka muhtemele de şansê ma est o ke ma mudaxeleyêko tesîrin û lezêr bikerê.

Reyna Yilmazî va ke ekîbê 20 kesî do perwerdeyê hîsîyarîya afatan bido komelî, ke ê nê perwerdeyî wendegehan, sazgehan û taxan de bêrê dayene.

Personela DBB'yî Leyla Çiftçî va ke bi perwerdeyî ê musayî ke heyecanê xo îdare bikerê û enkazanê erdlerzan rê senîn mudaxele bikerê.