Kongreya 43. ya Adetî ya Pêroyî ya Yewîya Şaredarîyanê Almanan, 13-15ê Gulane Almanya de bajarê Hannoverî ke paytextê eyaletê Saksonyaya Cêrî yo, mêmandarîya Şaredarîya Hannoverî de virazîya.

Kongre de Hemşaredara ma Serra Bucak, Hemşaredarê Qezaya Baglar Siraç Çelik û teqrîben 1500 temsîlkarî beşdar bîyî. Hemşaredare Bucak ke kongre de qisey kerd, bale ant polîtîkayê qeyyûmî ke Tirkîya de yenê tetbîqkerdiş û rexne kerd ke şaredarî kewenê hepis û karê xo ra yenê dûrîvistene.

Bucak dîyar kerd ke karê bajaranê embazî, destekê averşîyayîşê demokrasî û nêzdîbîyayîşê kulturan kenê û îfade kerd ke ê amade yê seba hemparîya xebatanê ciwanan, xebatanê cinîyan û seba babetanê bînan.