Sereka Daîreya Karanê Kultur û Komelkîyan a Şaredarîya Amedî ya Şaristanê Girdî Zeynep Yaş, derheqê beytanê şaîranê edebîyatê kurdkî ke kerrayanê peyerayîran ser o nusîyayî de rexne û waştişan rê cewab da û va, "Ma bi nuştişê vateyê aliman, waşt bala şarî biancê erjanê ziwanê kurdkî ser."

Sereka Daîreya Karanê Kultur û Komelkîyan Zeynep Yaş, bi munasebetê 15ê Gulane Roja Ziwanê Kurdkî derheqê beytanê şaîranê edebîyatê kurdkî ke kerrayanê peyerayîran ser o ke Cadeyê Xazî de nusîyayî, rexne û waştişan ser o Merkezê Kultur û Kongreyê ÇandAmedî de beyanat da. Yaş qeyd kerd ke seba ziwanê kurdkî hîna zaf vila bibo, bi nuştişê vateyê aliman plaketan ser o, înan waşt ke bala şarî biancê nê erjanê muhîman ê ziwanê kurdkî ser o û va, "Ma qerar da ke ma bala birayê ma û wayê ma yê ciwanî, domananê ma ke  ke kûçe û cadeyanê ma de gêrenê, biancê kurdkî ser o. Bi hezaran serran o ke no ziwan qisey kerdo, nê alimî, zanayî û nuştoxî bi ziwanê xo mîrasêkê zanayîşî û aqilî dayo ma."

'Ma hedef kerd ke ma kokê xo bifînê ziwananê kehenan ê bajarî’

Yaş îfade kerd ke ê bi abîyayîşê Mudirîya Pawitiş û Averberdişê Ziwanan ya Şaredarîya Şaristanê Girdî hedef kenê ke xo biresnê hem kokanê ziwanê kurdkî hem zî ziwananê kehenan ê bajarî, û bale ant ke ê bi munasebetê 15ê Gulane Roja Ziwanê Kurdkî cehd kenê ke her goşeyê bajarî de wendiş û hunerî reyde zafziwanî û zafkulturî bîyarê vernîya şarî.

'Ma bala şarî ant erjanê ziwanê kurdkî ser'

Yaş va, "Ma bi xizmetê Alo Kurdî, bi xemilnayîşê kûçe û meydanan, bi etiketê nameyê zebze û meywan ke marketanê ma de bi kurdkî yê, bi nuştişê vateyê alimanê ma plaketan ser o, ma waşt bala şarî biancê erjanê ziwanê kurdkî ser" 

'Ma wazenê her kesan reyde têkilî ronê'

Yaş dîyar kerd ke rexne û waştişê şarî seba înan qîmetin ê û va, "Ma zî wazenê ke her keso ke linga xo nana nê erdanê pîrozan, bibo parçeyê nê erdan, bi zanayîş ser o vindero, binê linganê xo ra biewnîyo, nuştişê ke uca de est ê bimuso, têkilî rono tarîx, kultur, ziwan û tecrubeyê nê welatî reyde."

'Ma do xebatanê xo dewam bikê'

Mudirê Şefîya Pawitiş û Averberdişê Ziwanan ya Serekîya Daîreya Karanê Kultur û Komelkîyan Tahir Baykuşakî zî îfade kerd ke xebatanê înan tena kerrayanê peyerayîran de nêvindeno û va ke ê do beytê edebîyatkaranê kurdan qada sûrî de cayê keskî û parkan de zî dewam bikê.