Hemşaredara Şaredarîya Amedî ya Şaristanê Girdî Serra Bucak, beşdarê "Kombîyayîşê Cinîyan ê Wextê Mabênî yê Rayberîyanê Herêmkî yê Demokratîkan" bîye û dîyar kerd ke ê pîya nê prosesê tarîxî de aştîya komelkî û demokratîzekerdişî do awan bikerê.

Hetê Partîya Seypêyî û Demokrasî ya Şaran (DEM Partî) ra "Kombîyayîşê Cinîyan ê Wextê Mabênî yê Rayberîyanê Herêmkî yê Demokratîkan" Merkezê Kultur û Kongreyê ÇandAmedî de dest pêkerd. Kombîyayîşo ke 2 rojî do dewam bikero, tede Hemşaredara Şaredarîya Amedî ya Şaristanê Girdî Serra Bucak, Hemsereka Pêroyî ya DEM Partî Tulay Hatîmogullari, Hemsereka Pêroyî ya Partîya Herêman a Demokratîke (DBP) Çigdem Kiliçgun Uçar û hemşaredarê cinî beşdar bîyî.

Hemşaredare Bucak: Cinî subjeyê nê prosesî yê

Hemşaredare Serra Bucak ke akerdişê kombîyayîşî de qisey kerd, beşdaran silam kerd. Bucak ke dîyar kerd ke ê prosesêko zaf muhîm ra vîyarenê, wina qisey kerd: "Taxan de, bajaran de her qade de avankerdişê komelê demokratîk û aştî de ma zanê ke cinî subjeyê nê prosesî yê. Bi nê zanayîşî ma xebatanê xo pêroyê herêmanê xizmetê cinîyan de bi nê perspektîfî dewam kenê. Ma sey cinî asan nêresayê tîya. Ewro seba ke embazê ma yê ke berdel dayê est ê, kede û mucadeleyê înan rayîrê ma do roşin keno û ma do her dem nê yewbîyayîşî aver şêrê."

'Ma do serrêk analîz bikê'

Hemşaredare Bucak ke qeyd kerd ke ê do dewam bikerê ke zêdekerdişê keda cinîyan û mucadele organîze bikê, va "Ewro û meşt ma do babetanê zaf qîmetînan ser o qisey bikê, ma do serra vîyarta analîz bikê, ma do analîzê kede û mucadeleyê ma yê hemparî yê weçînayeyê cinîyan bierjnê. Serranê ameyoxan, bi perspektîfê azadîya cinîyan bi şîarê 'Cinî cuye ya, cuye waştişê xoîdarekerdişî yo' ma senî rayîr gênê, nê çîyan ma do munaqeşe bikê. Salone de do heyecan, tewirîye û rengînîye hakim bibo, ma nê êdî hîs kenê. Ma hêvî kenê ke pêroyê xebatanê ma rê roşnî bido".

'Ma do qeyûman bişawê'

Hemşaredar Bucak ke îfade kerd ke serrêk de prosesanê zehmetînan ra vîyartî, qiseykerdişê xo wina dewam kerd: "Nê prosesî de tena babetêka zaf muhîm est a; tayînkerdişê qeyûman. Hemşaredarê ma yê ke qeyûm ameyî tayînkerdene û wezîfeyê înan ameyî gorewtene uca yê, ma heme înan bi hes û hurmet silam kenê. Ma tîya ra reyna peyamê xo danê; ma pîya nê prosesê tarîxî de aştîya komelkî û demokratîzekerdişî do awan bikê. Ma do qeyûman bişawê û hemşaredarê weçînayeyî reyna Wan de, Mêrdîn de, Sêrt û Dêrsim de do bivînê, ez bawer kena."

Kombîyayîş, badê qiseykerdişê Hemsereka Pêroyî ya DEM Partî Tulay Hatîmogullari û nîşandayîşê sînevîzyonî dewam kerd.