Têhetameyîşê "Cinyan ê Kede, Kultur û Hunerî yê Amedî" ke Şaredarîya Şaristanê Girdî ya Dîyarbekirî organîze kerd, bi konserê ke Gruba Govende ya KASEDjin û Hunermende Xecê da, qedîya.

"Têhetameyîşê Cinyan ê Kede, Kultur û Hunerî yê Amedî" ke bi rayberîya Serekîya Daîreya Xizmetanê Cinî û Keyeyî 3 rojî Meydanê Berê Koyî de ame organîzekerdene, bi çalakîyan qedîya. Roja peyêne ya têhetameyîşî de Serekîya Xizmetanê Cinî û Keyeyî ya Şaredarîya Sûrî Atolyeya Vilikê Huşkkerdeyî yê Mîyanê Çerçewaya Epoksî; Serekîya Xizmetanê Cinî û Keyeyî ya Şaredarîya Yenîşehîrî zî Atolyeya Mûman organîze kerd. Cinîyan atolyayan rê eleqeyo pîl nîşan da.

'Hetê psîkolojîk ra rehet keno'

Mudira Xizmetanê Cinî û Keyeyî yê Şaredarîya Yenîşehîrî Fatma Bakir Vural, îzah kerd ke ê Atolyeya Mûman seba ke beşê cîya-cîyayî îstîfade bikerê nê xebatî kerdî. Vural wina qisey kerd: "Tîya ma şarê xo rê mum senî vejîyeno, çi şuxulnîyeno, kamcîn merhelan ra vîyarto, nê çîyan seba ke bimusê yew atolye organîze kerda. Hem seba ke ê hetê psîkolojîk ra xo rehet bikerê hem zî eke nê çîyî pêşkeş bikerê, hetê ekonomi ra qezencêk bigîrê, ma sey Şaredarîya Yenîşehîrî destek danê. Ma Merkezê Miqateyê Cinîyan ê Rojaneyî de perîyodîk atolyeyê mûman organîze kenê. Ma heme cinîyê ke wazenê beşdar bibê, Merkezê Miqateyê Cinîyan ê Rojaneyî de pawênê."

'Ma wextêko zaf rind vîyarna'

Zelal Zugurli Bugdayci ke beşdarê atolye bîye, îfade kerd ke a atolye ra keyfweş a û va: "Ma wextêko zaf rind vîyarna, ez zaf keyfweş bîya. Pêroyê wextî de cuya ma rutîn a, hema bi yew ferq ame cuya ma."

Coşê konserî

Têhetameyîşê Cinyan ê Kede, Kultur û Hunerî yê Amedî de roja peyêne de Gruba Govende ya KASEDjin û Hunermende Xecê sahne girewt. Konserî de Sereka Daîreya Xizmetanê Cinî û Keyeyî Ozden Gurbuz Sumer qisey kerd, cinîyê ke têhetameyîşî de kede daya, înan rê sipas kerd.

Zaf kes beşdarê konserî bîyî, pîya deyîrî kerdî û govende girewte.