Rojanê Kitabanê Kurdkî ke Şaredarîya Şaristanê Girdî ya Dîyarbekirî organîze kerd, bi beşdarîya weşanxaneyanê kurdan Meydanê Şêx Seîdî de ame akerdene. Akerdişê Rojanê Kitaban de Hemşaredar Dogan Hatunî qisey kerd û îfade kerd ke ê do kurdkî rê wayîrî bikê.

Rojanê Kitabanê Kurdkî ke Serekîya Daîreya Karanê Kultur û Sosyalan çarçewaya 15 Gulane Roşanê Ziwanê Kurdkî de Yewîya Weşanxaneyanê Kurdan (YEWKURD) reyde organîze kerd, ame akerdene. 33 weşanxaneyî, weqf û rêxistinê komelê sivîlî yê ke warê ziwanî de xebitênê, beşdarê Rojanê Kitaban bîyî. Rojanê Kitaban mabênê 27 Gulane -1 Hezîrane de Meydanê Şêx Seîdî de seba heskerdoxanê kitaban do akerde bibo. Rojanê Kitaban de 6 rojî panel, qiseykerdiş û goşdarîya şîîran bibê.

Akerdişê Rojanê Kitabanê Kurdkî de Hemşaredara Şaredarîya Şaristanê Girdî ya Dîyarbekirî Dogan Hatun, hemşaredarê şaredarîyanê qezayan, weşanger û temsîlkarê rêxistinanê komelê sivîlî, serekê daîreyan, endamê meclîsî, nuştox û heskerdoxê kitaban beşdar bîyî.

Hemşaredar Hatun: Ma do ziwanê xo her qade qisey bikê

Akerdişê Rojanê Kitaban de Hemşaredare Dogan Hatun qisey kerd û weşangeranê kurdan rê teşekkur kerd ke yewîye awan kerda û va "Ez bawer kena ke no yewbîyayîşê şima seba yewîya şarê kurdan zî bibo çilkêka awe."

Hemşaredar Hatunî nê çîyî vatî "93 serran ver ewro Kovara Hawar kilêka adirî veşna û ewro, a kile Meydanê Şêx Seîdî de bîya roşnî berqêna. "Ma do ziwanê xo her qade de qisey bikê, wayîrî bikê.”

'No meydan do bibo meydanê kurdkî'

Hemşaredare Hatunî venga şarê Amedî da û va "6 rojî no meydan meydanê kurdkî yo. Bi hezaran kitabê kurdkî ameyî nuştene, nuştoxê ma tîya yê. Bêrê nuştoxanê ma bişinasnê, tarîxê înan bivînê. Nê 6 rojan de 20 panelî zî est ê, şima eşkenê înan goşdarî bikerê. Meydan meydanê Dîyarbekirî yo, meydan meydanê ziwanî yo, ma nê xebatan rê piştî danê."

Konser ame dayene

Qiseykerdişê akerdişî ra dima Grûba Peyal konserêk da. Şaro ke beşdarê akerdişê Rojanê Kitabî bîyî, pîya deyîran reyde govende girewte.