Hemşaredarê Şaredarîya Amedî ya Şaristanê Girdî Dogan Hatun beşdarê kombîyayîşê muxtaranê taxan ê qezaya Licê bî û va ke seba reyîranê taxanê dewan plansazî kenê û do probleman safî bikê.

Serekîya Daîreya Çapemenî, Weşan û Têkilîyanê Şarî ya Şaredarîya Şaristanê Girdî, seba ke beşdarîye îdareya şaristanî de zêde bikero, hewcedarîyanê taxan bido dîyarkerdene û çareyan biafirno, kombîyayîşanê muxtaran dewam kena. Badê kombîyayîşanê qezayan ê Yenîşehîr û Sûrî, Hemşaredarê Şaredarîya Amedî ya Şaristanê Girdî Serra Bucak û Dogan Hatun, Licê û Pasûr de muxtaran reyde ameyî têhet.

Lîce de muxtaran reyde têhetameyîş

Hemşaredar Dogan Hatun, Taxa Mumînaga ya Qezaya Licê de keyeyê tazîyeyî de têhetameyîşî de muxtarê taxan goşdarî kerdî. Kombîyayîşî de Hemşaredar Hatunî reyde Hemşaredarê Şaredarîya Licê Dilek Diyar Ozer û Firat Demir, serekê daîreyan, endamê meclîsî û muxtarî beşdarê ci bîyî.

Akerdişê têhetameyîşî de Hemşaredara Şaredarîya Licê Dilek Diyar Ozer qisey kerd û muxtaranê beşdaran rê sipas kerd û va ke ê seba temînkerdişê hewcedarîyanê taxanê Licê ameyê têhet.

Hemşaredar Hatun: Krîzê awe do bêro wedartiş

Kombîyayîşî de Hemşaredar Hatunî qisey kerd û problemê binawanî yê 8 serran ê tahrîbatê qeyyûmî û erdlerzî îfade kerdî û va ke ekîbî seba çareserkerdişê nê probleman bi şewe û roj xebitênê. Hatunî va ke Tesîsê Awguznayîşê Awe yê şaristanî 25 serran ra ver goreyê nifûsê 1 mîlyon 160 hezar kesan ameyo awabkerdene û ewro nifûsê Amedî zêde bîyo û no qîm nêkeno. Hemşaredar Hatunî va ke seba temînkerdişê hewcedarîya awa şimitişî ya şaristanî xebatî seba nifûsê 2.5 mîlyon dewam kenê. Hemşaredar Hatunî wina dewam kerd: "2016î ra heta nika şaristan zaf lez gird bî la nê warî de xebatî nêameyî kerdene. La şikir ke ma hazir bîyî û xebatanê ma reyde ma nêzdî yê ke nê xebetan biqedênê. Emser ma DÎSKÎ reyde xebat kerd ke krîzî wedarê û qezayanê ma yê dewan rê zî butçe abirna. Heta 2026î krîzê awe heme şaristanê ma de do bêro wedartiş."

'Ma do piştî bidê ciwîyayîşê dewan'

Hemşaredar Hatunî va ke nê tena problemê rayîr û awe nîyê, ê do xoza bipawê û herre reyna kesk bikê. Hatunî wina va; "Ma do piştî bidê ciwîyayîşê dewan û kesk bikê. Ma do bixebitîyê ke dewî reyna bibê cayê ciwîyayîşî".

'Seba reyîrê taxanê dewan plansazî ameyî kerdene'

Hemşaredar Hatunî va ke Şaredarîya Licê  reyde pîya înan seba reyîranê taxanê dewan planî viraştî û wina dewam kerd: "23ê na aşme de seba qezayanê dewan îhaleyê ma dest pê kenê. Ma nêeşkenê reyêk de her çî bikê. Ma do parçe-parçe bikê. Verê yê înanê ke hîna zaf hewcedar ê, ma do verê yê înan virazê û dima yê hemînan bikê."

Muxtaran waştişê xo îfade kerdî

Kombîyayîşî de muxtaran qisey kerd û seba têhetameyîşî hemşaredaran rê sipas kerd. Muxtaran waştişê xo yê rayîr, awe, res, dermankerdiş, binawanî û kanalîzasyonî îfade kerd û waşt ke taxan de çalakîyê kultur û hunerî bêrê organîzekerdene, seba ciwanan sazgehê perwerdeyî bêrê avakerdene.

Zîyaretê Şaredarîya Licê

Hemşaredar Dogan Hatun, badê têhetameyîşê muxtaran Şaredarîya Licê zîyaret kerd. Hemşaredar Hatun, hetê Hemşaredaranê Şaredarîya Licê Dilek Diyar Ozer û Firat Demir ra ame peşwazîkerdene. Zîyaretî de derheqê xebatanê şaredarîye yê qeza fikrî ameyê parekerdene.