Hemşaredara Şaredarîya Şaristanê Girdî Serra Bucak, Hemşaredarê Şaredarîya Pasûr reyde pîya qeza de muxtaranê taxan reyde ameyî têhet û waştişê înan goşdarî kerdî. Hemşaredar Bucak va ke seba çareserîya çareserkerdişê probleman kombîyayîşê înan do dewam bikerê.

Serekîya Daîreya Çapemenî, Weşan û Têkilîyanê Şarî ya Şaredarîya Amedî ya Şaristanê Girdî seba ke beşdarîye îdareyê şaristanî de zêde bikero û hewcedarîyanê taxan goşdarî bikero, kombîyayîşanê muxtaran dewam kena. Hemşaredara Şaredarîya Şaristanê Girdî Serra Bucak, Hemşaredarê Şaredarîya Pasû Fatma Ay û Murat Îpekî reyde pîya seba ke problemanê taxanê qezaya Pasûrî cayê înan de goşdarî bikero û pêşnîyazanê çareyî awan bikero, muxtaran reyde ameyî têhet. Kombîyayîşo ke Şaredarîya Pasûr de ame organîzekerdene, Hemşaredaran ra teber serekê daîreyan, endamê meclîsî û muxtarê taxan beşdarê ci bîyî.

Muxtaran kombîyayîşî de, problemê awe ê dewan, problemê resî, parkê tutan û xîzmetanê tazîye ser o zaf babetan de waştişê xo îfade kerdî. 

Hemşaredar Bucak: Vernîya zîmistanî rayîranê grûban do qedîyayî bê

Kombîyayîşî de Hemşaredar Serra Bucak va ke Pasûr hem şertê cografyayî hem zî rewşan dezawantajî ra ke derûdorê ey de pêrodayîş est bî, rayîrê ey qezayanê bînan ra xirabêr ê û wina dewam kerd: "Ma do rayîranê grûban vernîya zîmistanî Pasûr de biqedênê."

'Seba çareserkerdişê problemanê kombîyayîşê ma do dewam bikê'

Hemşaredar Bucak ke va dewlet 30 serrî yo Amed û dewê ey xo vîr ra kerdî, wina dewam kerd: "Nika 14 aşman de, reyêk de heme problemî nêyenê çareserkerdiş. Eynî wext de mumkun nîyo ke heme dewan de problemê awe çareser bikê, no mumkun nîyo. Ganî her kes nê fehmî bivurno. Problemê ma zaf ê, personelan ra heta erebeyan, heta vindarnayîşê dewlete zaf problemî est ê. Ma wazenê mîyanê Licê, Pasûr, Karaz de îstasyonêkê çopî awan bikê la yeno vindarnayene. La ma nêvindenê, ma do bixebitîyê. Se bikê zî ma do naye çareser bikê. Seba çareserkerdişê probleman kombîyayîşê ma do dewam bikê."

Zîyaretê Şaredarîya Pasûrî

Hemşaredar Bucak, badê kombîyayîşî Şaredarîya Pasûrî zîyaret kerd. Hemşaredarê Şaredarîya Pasûrî Fatma Ay û Murat Îpek, Hemşaredare Bucak awanîya şaredarîye de peşwazî kerd. Hemşaredare Bucak, awanîya xîzmetê şaredarîye de hemşaredaraj reyde kombîyayîşêk viraşt.

Hemşaredare Bucak ke derheqê xebatanê qeza de melûmatî girewtî, Ay û Îpekî rê vilî dayî û seba xebatanê înan serkewtiş waşt.