Mudirîya Pêroyî ya DÎSKÎ ya Şaredarîya Amedî ya Şaristanê Girdî, Taxa Yeşîltaşî ya Qezaya Çinarî de şebekeya awa şimitişî ke 15 serrî yo nêxebitîyayöne, newe kerd û reyna awe daye.

Mudirîya Pêroyî ya Îdareyê Awe û Kanalîzasyonî ya Amedî (DÎSKÎ), goreyê waştişê şarî dest bi karî kerd û Taxa Yeşîltaşî ya girêdayeyê Qezaya Çinarî de şebekeya awa şimitişî ke 15 serrî yo xebitîyayêne, reyna da xebitnayîş. Taxa ke tede nêzdîyê hezar kes ciwîyeno û 110 keyeyî est ê, 60 keyeyan rê awe ame dayene û seba keyeyanê bînan zî xebatî dewam kenê.

Xeta ke 2005î de ame viraştene, 2010î de xirab bîye, pê Taxa Yeşîltaşî rê 2005î de awa şimitişî ameybî dayene la 2010î de seba xeletîyêk awe birîyaye. Şarê taxe nê tarîxî ra nat 15 serrî awa şimitişî de problemê girdî dîyî. Ekîbê Şefîya DÎSKÎ ya Qezaya Çinarî, waştişê muxtarê taxe ser o dest bi karî kerd, badê keşfê sahayî xeletî tesbît kerde û prosesê mudaxeleyî dest pêkerd.

Çarçewaya xebatan de şebeke ame tamîrkerdiş, çimeyê sondajî reyna ame xebitîyayîş, binawanîya awa şimitişî ke 15 serrî nêxebitîyayêne, sere ra heta peynî ame kontrolkerdiş. Mîyanê taxe de xeta awa şimitişî ya nêzdîyê 400 metreyî, cayê xirabî reyde pêro ame newekerdene. Trafo ke demêko derg nêxebitîyaybî, prosesêko detayîn ê tamîrî ra vîyart û ame xebitîyayîş. Depoyê awe ke 2005î de ameybî viraştene û 2010î ra nat nêameybî xebitnayene, badê pakkerdiş û kontrolêko hîrayî reyna ame xebitnayene. Çimeyê sondajî ke bi serran nêxebitîyaybî, ame rehabîlîtekerdene û aktîf bî; nimûneyê awe ke çime ra ame girewtiş, laboratuwarî de ame analîzkerdene û musîya ke goreyê standardanê awa şimitişî ya. Badê heme prosedûran, awa ke çimeyê sondajî ra vejîyena reyna erşawîyaye depoyî û sîstemê temînê awe yê taxe pêro ame xebitîyayîş.

Heme xebatê sahayî, koordînasyonê Serekîya Daîreya Şefîya Xebatan ya DÎSKÎ de, hetê ekîbanê Şefîya Çinarî ra ameyî kerdene. Xebatî hem bi ekîbanê teknîkî hem zî bi îrtîbatê şarê taxe, bi fehmêko beşdarîye ameyî viraştene.