Şaredarîya Amedî ya Şaristanê Girdî, 'Şayîya Gedeyan a Dewan' ke seba ke gedanê taxanê dewan kultur û hûnerî reyde bîyarê têhet, da destpêkerdene. A yewine Taxa Kemika ya girêdayeyê Qezaya Pasûrî de dest pêkerd.

Şayî de ke Serekîya Daîreya Xebatanê Kulturî û Sosyalan bi Şaredarîya Pasûrî pîya organîze kerd, bi seyan gedeyî keyeyanê xo reyde beşdar bîyî. Programî de gedeyan xo rê resimî viraştî, atolyeyanê muzîkî de xebatê rîtmî kerdî û bi rehberîya perwerdekaran vejîyayî sehne ser pêşkêşîya koroyî kerde.

Grûba Tîyatroyî ya Arsen Poladov a girêdayeyê Merkezê Kulturî yê Baharî yê Êlihî kayê "Heqîqet" pêşkêş kerd û temaşekaran ra çepikî kutî.

Gede û keyeyanê înan îfade kerd ke dewe de reya verêne no tewir şayî yena organîzekerdene, Şaredarîya Amedî ya Şaristanê Girdî û Şaredarîya Pasûrî rê sipas kerd.

'Ma zaf keyfweş bîyî'

Gedeyê beşdaran ra Elîf Kilic îfade kerd ke ê zaf keyfweş bîyî û wina va: "Ma mûsabeqeya resimî kerde, kilamî vatî, zaf keyfin bî. Ma embazanê xo reyde keyfweş bîyî. Zaf rind bî."

Mehmet Kilicî ke dîyar kerd ke rojêka zaf rinde vîyarnaya, va: "Ma ameyî tîya saz cinite, kay kerd. Zaf rind bî."

Zeynep Kilic zî hîsanê xo wina îfade kerd: "Ewro seba ma cayêko zaf rind virazîyayo. Ma resimî vitaştî, tîya de ma zaf şa bîyî. Muzîkî est bîyî, zaf keyfin bî. Heme gedeyî zaf şa bîyî. Ma zaf sipas kenê."

Aktîvîte de Hemşaredarê Şaredarîya Pasûrî Murat Îpek, endamê meclîsê şaredarîye û xeylê welatîyî beşdar bîyî.