Şaredarîya Şaristanê Pîlî ya Amedî û Mudirîyê Polîtîkayanê Cinîyan ê şaredarîyanê qezayan, Parka Koşuyolî de vera qeetlanê cinîyanê ke demê peyênî de zaf bîyê vêşî, xebata hişyarîye daye destpêkerdene.
Serekîya Dayîreyê Xizmetanê Cinîyan û Keyeyan û Mudirîyê Polîtîkayanê Cinîyan ê şaredarîyanê qezeyan, prosesê peyênan de zêdebîyayîşê qetlanê cinîyan û vera cinîyan şîdetî ser o seba ke hişyarîya komelkî virazê, Qeza Yenişehir, Parka Koşuyolî de amey têhet.
Waro ke Merkezê Cigêrayîş û Tetbîqan ê Problemanê Cinîyan ê Amedîyo ke binê banê Şaredarîya Şaristanê Pîlî de falîyetanê xo keno û şaredarîyanê qezayan tey standê xo akerdê de, sînevîzyon ame nawitene ke vera şîdeto ke cinîyan rê êno kerdene, zanitişê komunîkasyonî ê merkezanê ke cinî eşkenê sere piro dê ameyî pêşkêşkerdene.
Sereka Dayîreyê Xizmetanê Cinîyan û Keyeyan Özden Gürbüz Sümer derheqê Xebatanê hişyarîyê ke zaf cinî ameyê têhet û pîya dayo destpêkerdene de îzahat da û îfade kerd ke ê sey yew parçeyê kampanyaya "Qiseyê Ma Nêqedîya, Şîdetî do Pîya Bivindarnîme" tîya de cayê xo girewto.
'Ma Cehd Kerd Ke Na Kampanya Taxan Û Bejeyîyan De Biramîme'
Sümer îfade kerd ke ê cehd kenê ke şaredarîyanê qezayan reyde kampanya rayîr ra bêrê û vat: “Ewro tîya de, ma esasên sey yew parçeyê yew kampanyaya ke 25 Teşrîna Peyêne de ma ramita, vinetîme. Na kampanyaya ma, kampanyaya "Qiseyê Ma Nêqedîya, Şîdetî Do Pîya Bivindarnîme" bîye. Û ma 25 Teşrîna Peyêne ra heta ewroyî, hem sey Şaredarîya Şaristanê Pîlî hem zî sey şaredarîyanê qezayan hem zî sey embazê ke warê cinîyan û vera şîdetî mucadelekerdişî de xebitîyenê, taxan, bejeyîyan de ma cehd kerd ke na kampanya biramîme.
Ma Yew Rastîya Vêşîbîyayîşê Şîdetî De Rî Bi Rî Me
Sümer îfade kerd ke Amedî de aşma peyêne de qetilkerdişê 4 cinîyan û bi hewayo şikdar merdişê yew cinîye ra dima, ganî na mesele êdî tena rojeva cinîyan ney, bikewo rojeva şaristanî zî. Sümer dewam kerd û vat “Noqtaya peyêne de ma yew rastîya vêşîbîyayîşê şîdetî de rî bi rî me. Yew dewro ke şîdetê vera cinîyan her ke şono bi qatan beno zêde û dewam keno de, bi taybetî aşma peyêne de şaristanê ma de qetilkerdişê 4 cinîyan û bi hewayo şikdar merdişê yew cinîye ra dima, ma fikirîyayme ke ma ganî na mesela tena mekerîme rojeva cinîyan, ganî bikerîme rojevê şaristanî zî.”
'Ma Do Şîdetî Pîya Bivindarnîme'
Sümer îfade kerd ke înan xebatê “Vera Cinîyan Şîdetî Ra Vindevatişî” Parka Koşuyolî de dayê destpêkerdene û Sümer qiseyê xo wina temam kerd: "Ma do parkan de bi şewan çalakîyanê cîyayan bikerîme. Ma startê nê xebatan Parka Koşuyolî de danîme. Verê verkan pêro merkezê piştidayîş û xebate ke vera şîdeto ke cinîyan rê êno kerdene mucadele kenê, do standanê xo akerê. Ewro tîya de ma dest pêkerd labelê senî ke ma vat 4 qezayanê ma yê merkezîyan de hem zî qezayanê ma yê teberî de û dewan de xebatanê na kampanya do bikerîme. Ma do pêro pîya şîdetî ra vinde vajîme. Naye ra tîya yîme. Reyna tekrar kena: Qiseyê Ma Nêqedîya, Ma do Şîdetî Pîya bivindarnîme."
Hemwelatîyan rê Broşûr Ame Vilakerdene
Îzahatî ra dima cinîyan broşurê ke ser o sloganê sey "Ma Mucadeleyê Xo Yê Vera Şîdeto ke Cinîyanê rê Êno Kerdene Do Pêt Bikerîme, Ma vera Qirkerdişê Cinîyanê Sere Wedarenîme" û "Qiseyê Ma Nêqedîya, Şîdetî Do Pîya Bivindarnîme" nusîyayê hewmwelatîyan rêvila kerdî. Wexto ke cinîyan broşurî kerdî vila eynî wextî de zanitiş da hemwelatîyan ke vera şîdeto ke cinîyan rê êno kerdene ganî se bikerê.
Xebata hişyarîye vera qetlanê cinîyan, seranserê hamnanî, pêroyîyê şaristan û pêro qezayan de, parkan de do dewam bikero.
