Şaredarîya Amedî ya Şaristanê Girdî û sazgeyanê sîvîlî, 17-19ê Teşrîna Verêne de Forumê Awe yê Mezopotamya yo 2. organîze kenê.

Amed, forumî rê ke reya yewine 2019 de şaristanê Silêmanîye de ame organîzekerdene, nika dîyinî rê mêmandarîye keno. Şaredarîya Şaristanê Girdî, hereketê ekolojîyî û sazgehê sîvîlî dawetê forumî bîyî. Forum 17-19ê teşrîna verêne de Merkezê Kulturî û Kongreyî yê Çand Amedî de do bêro organîzekerdene.

Hewzeyê Awe Do Bêrê Qiseykerdene

Serekîya Daîreya Vurînayîşê Îklîmî û Sifir Eşteyî organîzasyonîya forumî kena. Forumî de Hewzeyanê Mezopotamya de awe û meseleyê girêdaye awe, Royê Dîcle û Firatî û Gola Wanî ser o, hewzeyê awe bi pêroy do bêrê qiseykerdene.

Polîtîkaya Awe

Forumê Awe yê Mezopotamya prensîbê azadîya cuye, hemsengîya ekosîsteman û edaletê ekolojîkî ser o polîtîkayêka awe qebul keno. Forum bal anceno ke Mezopotamya de estbîyayîşê awe tena çimeyê fîzîkî nîyê, eynî wext de vîrê tarîxî ya şaran, cîyabîyayîşê kulturî û şeklê cuya pîya yê.

Welatan ê Cîya-cîyayan ra

Forumî de Tirkîya, Ewropa, Îran, Iraq, Sûrîye ra 100 ra vêşêr temsîlkarê sazgeyanê sîvîlî ke seba heqê awe mucadele kenê, aktîvîstî, cigêrayoxî, rojnamegerî û temsîlkarê komelê herêmkîyan beşdar benê.