Şaredarîya Amedî ya Şaristanê Girdî, baxçeyê nebatanê tîbbî û aromatîkan ê ke do qadêka 14 hezar metrekareyî ser o bêro awankerdene û reya verêne şaristan de do bêro bicaardene, xebatê binawanî qedênayî û dest bi xebatanê serawanîye kerdo.

Projeyo ke Serekîya Daîreya Park û Baxçeyan, Serekîya Daîreya Vurînayîşê Îklîm û Sifir Eşteyî, Serekîya Daîreya Xizmetanê Dewan, Serekîya Daîreya Pawitişê Cugehî û Kontrolî û Serekîya Daîreya Xizmetanê Cinî û Keyeyî pîya bicaard, reya verêne şaristan de do bêro viraştene û do piştgirîya îstîhdamê cinîyan bikero. Baxçeyî de xebatê binawanî qedîyayî û xebatanê serawanîye dest pêkerd.

Baxçe qadêka 14 hezar metrekareyî ser o yeno awankerdene, çarçewaya xebatanê binawanî de ekîbê Serekîya Daîreya Park û Baxçeyan, seba ke qade goreyê nebatan hazir bikerê, xebatê xurtkerdişê erdî, teswîyeya zereyî, xetê drenajî, tesîsatê awe û ronayîşê bordûran qedênayî.

15 tewirê nebatî do bêrê ramitene

No baxçeyo taybetî ke Serekîya Daîreya Park û Baxçeyan ê qezaya Kayapinarî de do bêro viraştene, tede bi pêroyî 15 tewirê nebatî do bêrê ramitene: kekiko koyî, bîberîye, gaura, papatyaya tîbbî, rihana koyî, nane, naneyo tîbbî, ekînezya, gulê hatmî yê tîbbî, kanterono zerde, zeferan, gezgezok, klendula, melîsa û bîr.

Qade de 18 nezar nebatî do bibê

Serekîya Daîreya Park û Baxçeyan, nê projeyê muhîmî de teqrîben 18 hezar nebatî do biresno herre û pêşkêşê şarî bikero.