Şaredarîya Amedî ya Şaristanê Girdî, çarçewaya Aşma Hişyarîya Kanserê Memikan de Licê de Taxa Birlîkî de kontrolê weşîye kerd û derheqê têkoşînê vera kanserî û şîdetî de şar agahdar kerd.

Bi hemkarîya Serekîya Daîreya Karanê Weşîye û Serekîya Daîreya Xizmetanê Cinî û Keyeyî, çarçewaya "Aşma Hişyarîya Kanserê Memikan" de qezaya Licê de Taxa Birlîkî de çalakîyêk cinîyan rê ameye viraştene.

Çarçewaya programî de ekîbê weşîye cinîyan de kontrolê şekerî, tansîyonî, dergîye û kîlo kerdî. Pêşkêşîyê agahdarîye yê derheqê kanserê memikan û kanserê fekê rehmî de bi Kurdkî û Tirkî ameyî kerdene. Wexto ke muhîmîya teşhîso verên ame îfadekerdene, cinîyanê ke waşt kontrol û muayeneyê memikî zî ame kerdene û piştgirîya pratîkî ame dayene. Ekîban, çalakîye de cinîyan rê kîtê hîjyenî yê ke cuya rojane de eşkenê bêrê xebitnayene, vila kerd.

Xeta Alo Şîdetî 

Kontrolê kanserî ra teber, derheqê Xeta Alo Şîdetî de ke cinîyanê ke marûzê şîdetî mendî yan zî xo talûke de hîs kenê, 7 roje û 24 saetan piştgirî dano, agahî ameyî dayene û broşûrî ameyî vilakerdene. Sewbîna, derheqê heqanê cinîyan û mekanîzmayanê piştgirîye de ke eşkenê muracat bikerê, agahî ameyî dayene.

Çalakî herêmanê bînan de do dewam bikerê

Serekîya Daîreya Karanê Weşîye û Serekîya Daîreya Xizmetanê Cinî û Keyeyî, aşmanê payizî de herêmanê cîyayan de bi çalakîyanê weşan hedef kerdo ke cinîyan rê hişyarîye derheqê muhîmîya kontrolanê weşîye yê domdarîyan û tesbîtê verênî de bidê.