Seba Festîvalê Tiyatroyê Mîyanneteweyî yê 11. yê Amedî kombîyayîşê amadekarîye ame kerdene û deklarasyonê destekî ame weşanayene.

Bi hemkarîya Tiyatroyê Şaristanî yê Şaredarîya Amedî ya Şaristanê Girdî (DBŞT) û Enstîtûya Tiyatroyê Mîyanneteweyî (ITI Worldwide), seba Festîvalê Tiyatroyê Mîyanneteweyî yê 11. yê Amedî ke mabênê 24ê Nîsane – 2yê Gulane 2026î de do bêro organîzekerdene, kombîyayîşê amadekarîye ame kerdene û deklarasyonê destekî ameyî weşanayene.

'Amed 33 medenîyetan rê bîyo keye'

Sereka DaîreyaKultur û Karanê Komelkîyan Zeynep Yaş qiseykerdişê akerdişî de destnîşan kerd ke Amed 33 medenîyetan rê bîyo keye û wargeh û va: "Amanc o yo ke tîya de bingeyê aştîye, seypêyîye, averşîyayîş û roşnbîyayîşî bêro awankerdene."

24ê Nîsane – 2yê Gulane 2026î 

Festîvalê Tiyatroyê Mîyanneteweyî yê 11. yê Amedî dîyar bî ke do mabênê 24ê Nîsane – 2yê Gulane 2026î de do bêro organîzekerdene.

Kombîyayîşî de rejîsor û kaybazî Duhok, Hewlêr, Berlîn, Uganda û Ukrayna ra beşdar bîyî û tecrubeyê xo pare kerdî. ITI, deklarasyonî de ke weşana, va ke mîsyonê festîvalî rê “şar û kulturan mîyan de pirdê dîyalog, pêkerdiş û fehmkerdişî” piştgirî dana.