Şaredarîya Amedî ya Şaristanê Girdî pêroyê şaristanî de 17 de qezayan de seba ke beşdarîye zêde bikera û problemanê herême rê çareyan bivîna, pêdîyayîşanê muxtaran dewam kena.

Na çarçewa de Hemşaredara Şaredarîya Amedî ya Şaristanê Girdî Serra Bucak muxtaranê Hezro reyde ameye têhet.

'Ma heme problemê şima not kerdî'

Hemşaredara Şaredarîya Amedî ya Şaristanê Girdî Serra Bucak ke pêdîyayîşî de qisey kerd û problemê qeza yê rayîr, binawanî, kanalîzasyon û yê awe ardî ziwan û va: “Ma heme problemê şima not kerdî, şima va serrêk de yew kombîyayîş qîm nêkeno, ma do naye bigîrê çiman ver, eke lazim bibo ma do hîna zêde bêrê.”

Muxtaran zî va ke berardişê zîraetî yê qezaya bêrê naskerdene, rayîr, awe û binawanî bêrê başkerdene, sahaya futbolî bêra viraştene û goristan bêro başkerdene.