Festîwala 3. ya Fîlman ya Amedî ya Mîyannetewîye ke mêmandarîya Şaredarîya Amedî ya Şaristanê Girdî de û bi rayberîya Akademîya Sînema ya Rojhelatê Mîyanêne û Sînebîrî yena organîzekerdene, bi programêko pêt dewam kena.

Festîwala ke bi şîarê "Dinya sanikan reyde yena têhet" 84 fîlman do temaşekerdoxan reyde bîyaro têhet, badê akerdişê xo yê bicoşî, roja dîyine de bi weçînîyayîşêko dewlemend ê 13 fîlman sînemahesan reyde ardî têhet. Belgefîlmê Bira Stranan ke sey fîlmê akerdişî ame nîşandayene, bi seyan temaşekerdoxî ke salon pirr kerd, coşê akerdişê festîwale programê roja dîyine de zî dewam kerd.

Roja dîyine de sînemahesan bi fîlmê Zalava ke babeta ci vurîyayîşê zereyê merdimî yo û bi fîlmê Ra ke kulturê Elewîyan îzah keno, şahîdîya temayanê pêtan kerde. Fîlmê Li Baxçeyê Me Dareke Zeytûnê Hebû ke hîkayeya ê kesan a ke badê şerê Efrînî koçberê mecbûrî şîyî Almanya, temaşekerdoxan ra eleqeyêko gird dî. Festîwale, fîlmanê Pîrebok, Beriya Şevê, Ido, Pel'e, Aysha, It Was Just an Accident, My Name Is Hope, Kawyar, Salt Sellers û Ezmûn reyde dewam kerd.

Festîwale tena nîşandayîşê fîlman reyde sînordar nîya; bi sohbet, atolye û çalakîyanê hunerî hetkarîya cuya kultur-hunerî ya Amedî kena.