Hemşaredarê Şaredarîya Amedî ya Şaristanê Girdî Serra Bucak û Dogan Hatun, beşdarê Merasîmê Xelatdayîşê Danielle Mitterrandî bîyî ke Académie du Climatê Parîsê Fransa de ame organîzekerdene.

Emser xelate ke ame dayene komelê ke herême de seba demokrasîya herêmkî, azadîya cinîyan û cuya ekolojîk têkoşîn kenê, bi temsîlîye Hemşaredara DBB’yî ya Verêne Gultan Kişanak û temsîlkaranê TJA û Komela Ekolojî ya Amedî rê ame pêşkêşkerdene.

Hemşaredare Bucak: Têkoşînê demokrasîye bi qerardarî dewam keno

Hemşaredare Bucak ke merasîmî de qisey kerd, bale ante tecrubeyê demokrasîya herêmkî yê sîyasetê Kurdan ser o. Bucak îfade kerd ke tradîsyonê têkoşînê demokratîkî ke serranê 90î de dest pêkerdo, serra 1999î de rayberîyanê herêmkîyan de qonaxêko newe ra vîyart. Bucak va ke şaredarîya kurdan bi azadîwazîya cinîyan, beşdarîwazî û komelperestîya xo cîya ya û no fehm şaredarîyanê sîstemî yê Tirkîya ra cîya yo.

Hemşaredar Hatun: Enstîtu de seba ziwanê ma xebate yena kerdene

Hemşaredar Hatunî zî bale ante têkoşînê ziwan û kulturî ser o û ard vîrardene ke wexto Tirkîya de Kurdkî qedexe bî, dewleta Fransa ruxset da ke Enstîtuya Kurdan ya Parîsî bêra akerdene û Kurdkî rê wayîrê vejîya. Hatunî va: "Serran ra nat nê enstîtuyî de seba ziwanê ma xebatêka girde yena kerdene. Ez tîya ra bi hurmet Yilmaz Guney û Ehmed Kaya ana xo vîrî. Ma wazenê roşnvîr û hunermendanê xo welatê xo de bivînê."