Festîvalê Fîlman ê Amedî yo 3. yo Mîyannetewî ke bi şîarê "Dinya sanikan reyde yena têhet" 7-14ê Kanûne de ame organîzekerdene û bi nîşandayîş, atolye, panel û sohbetan sînemahesan rê cayêko têhetameyîşî yo hîra pêşkêş kerd, bi merasîmê xelatdayîşî ke bi beşdarîya Hemşaredara Şaredarîya Amedî ya Şaristanê Girdî Serra Bucak ame organîzekerdene, temam bî. 

Çarçewaya festîvalî de 84 fîlmî temaşekerdoxan reyde ameyî têhet.

Roja peyêne ya festîvalî de fîlmê "Sieger Sein" ke Soleen Yusefî rêjîsorîya ci kerda, "Uçan Köfteci (Koftekaro ke fireno)" ke îmzaya Rezan Yeşîlbaşî ya û "Em Kurd In" ke Banu Yalkut û Hanjo Breddemann pîya rêjîsorîya ci kerda, temaşekerdoxan reyde ameyî têhet.

Hemşaredare Bucak: Her çiqas zehmetî bibê zî ma pîya dewam kerd ke berheman bidê 

Hemşaredare Bucak ke merasîmî de qisey kerd, bal ante badê 8 serran muhîmîya newe ra organîzekerdişê festîvalî ser o. Bucake ke îfade kerd ke 8 serrê mabênî seba şaristanê Amedî û herême zehmetîyê cîdî viraştî, va: "Her çiqas nê zehmetî bibê zî, ma dewam kerd ke awan bikerê, berheman bidê û weşikîyan bi dostanê ke zerrîya înan bi sinema dana piro, pîya pîl bikerê. Nê 8 rojî, nîşanêko zaf muhîm ê nê prosesî bîyî."

Hemşaredare Bucak ard vîrardene ke prosesê festîvalî de problemê cayî bîyî û va: "Ameyoxî de  Festîvalê Fîlman ê Amedî de sînemahesî do bieşkê cayanê cîyayan ê şaristanî de, xeylê salonan de fîlman temaşe bikerê. Ma festîvalêk amanc kenê ke heme Amedî de vila bibo."

Hemşaredare Bucak, sînemager û sîyasetmedar Sirri Sureyya Onderî ard vîrardene û va: "Eke ewro biciwîyayêne, teqez do Amed de bîyêne. Ey do ma bidayêne huyayîş, bikerdêne ke ma bifikirîyê û sînemageranê ciwanan rê bibîyêne îlham."

Xelatan wayîrê xo dîyî

Merasîmî de xelatî kategorîyanê fîlmanê kilman, belgefîlman û fîlmanê dergan de ameyî eşkerakerdene:

•Xelata Fîlmê Kilman: "Bu Mucize mi Tesadüf mü?" - Taner Îbrahîm Tarî û Ronahî

•Xelata Senaryoya Belgefîlman: "Hucre, takekes-laş, civat" - Zelal Sadak 

•Xelata Fîlmanê Dergan: "Diroka Wenda" - Alî Kemal Çinar

•Xelata Mansîyonê Fîlmabê Kilman: "Sê Goşe" - Jîno Hadî Hesen

•Xelata Taybete ya Jurîyî (Fîlmê Kilman): "Garan" - Mahsum Taşkın

•Xelata Fîlmanê Kilman: "Kawyar" - Salem Salavatî

•Xelata Taybete ya Jurîya Belgefîlman: "All the Mountains Give" - Arash Rasha

•Xelata Belgefîlman: "Xalko" - Samî Mermer

•Xelata Rêjîsorê Asayîşî: "Cîran" - Stephane Kuthy

•Xelata Senaryoyî yê Sirri Sureyya Onderî: "Ezmûn" - Shawkat Amîn Korkî

•Xelata Kadroyê Estetîkî: "Berîya Şevê" - Alî Kemal Çinar

•Xelata Taybete ya Jurîyî (Fîlmanê Dergan): "Zalava" - Arsalan Amîrî

•Xelata Xoverdayîşî ya Yilmaz Guneyî: "Sonne" - Kurdwîn Eyûb