Bulwarê Selahedînê Eyyubî ke Şaredarîya Amedî ya Şaristanê Girdî bi xebatanê binawanî û asfaltî sere ra heta peynî newe kerdo, nika bi darûberinkerdişî û serûberkerdişê peyzajî, îklîmî reyde hemseng beno korîdorêkê cuye yo estetîk.

Bulwarê Selahedînê Eyyubî ke Serekîya Daîreya Miqateyê Rayîran û Kordînasyonê Binawanî aşmanê vîyarteyan de bi temamkerdişê xebatanê binawanî û asfaltî vurnayo aksêkê resî yo modern, nika bi serûberkerdişê peyzajî yo hîra nasnameyêkê estetîk qezenc keno. Prosesê newekerdişî ke teqrîben 1,2 kîlometreyan de yeno ramitene, tede bulwaro ke binawanîya ci ameya xurtkerdene, bi asfalto germ sere ra heta peynî ame newekerdene û rayîrê bisîkletan ame viraşetene, qonaxê neweyî de bi darûberinkerdişî û serûberkerdişê cugehî beno waranê cuye yê muhîman ê şaristanî ra yew.

199 Darî û 125 Lemî Herre Reyde Ameyî Têhet

Xebatanê hîrayan de ke tede unsurê roşnkerdişê dekoratîfî zî ameyî xebitnayene, peyarayîr û refujan rê 74 darê çinarî, 125 darê mûrîyê xemlî û 125 lemê adirî herre reyde ameyî têhet.

Xebatan de ke bi kordînasyonê Serekîya Daîreya Park û Baxçeyan yenê ramitene, warê binawanî û serawanîya ke Bulwarê Selahedînê Eyyubî de ameyî kerdene, bi destê nebatan dîyayîşêko hîna estetîk gêno.

War Seba Ronayîşê Nebatan Ame Amadekerdene

Ekîban, seba ke bulwar bibo ekosîstemêko domdar, prosesêkê amadekarî yo hîra ramit. Herra bêberheme refujan ra temamî ameye taxlîyekerdene û cayê înan de takvîyeyê herra xurtkerde ameye rokerdene. Badê tesvîyekerdişî bulwar, seba ronayîşê nebatan ame amadekerdene.

Bulwar do Îklîmî Reyde Hemseng Bêro Serûberkerdene

Xebatanê ke Serekîya Daîreya Park û Baxçeyan û Serekîya Daîreya Miqateyê Rayîran û Kordînasyonê Binawanîye pîya kenê, tede unsurê peyzajî ke bi şertanê îklîmê şaristanî reyde hemseng ê, do ca bigîrê.

 

Mehmet Olmez