Pêdîyayîşê cinîyan ke Şaredarîya Amedî ya Şaristanê Girdî taxan de dewam kena, na rey Mezraya Gorleka girêdayeyê Taxa Reşîka Hezro de ame viraştene. Çarçewaya bernameyî de hem kontrolê weşîye ameyî kerdene hem zî agahdarîya cinîyan a bingeyê heqan ame dayene.

Pêdîyayîşê cinîyan û xebatê kontrolê weşîye ke Serekîya Daîreya Polîtîkayanê Cinîyan û Serekîya Daîreya Karanê Weşîye seranserê şaristanî de taxan de ramena, dewam kenê. Çarçewaya bernameyî de Mezraya Gorleka Taxa Reşîkî ya girêdayeyê qezaya Hezro de kontrolê weşîye yo hîra ame viraştene.

Xizmetê weşîye ame dayene

Çarçewaya bernameyî de ke bi kordînasyonê Serekîya Daîreya Polîtîkayanê Cinîyan û Serekîya Daîreya Karanê Weşîye ame rayraberdene, hemwelatîyan rê cayê xo de xizmetê weşîye ame dayene. Muayeneyê doktorî, pêmawitişê qam-kîloyî, kontrolê tansîyon û şekerê gonî, testê hepatît û diganîyîye û xizmetê şêwirmendîya plankerdişê keyeyî ame dayene.

Hemwelatîyê ke nirxnayîşanê ekîbê weşîye de grûba rîskî de ameyî dîyene, seba prosesê tetkîk û dermankerdişê averşîyayeyî dezgehanê weşîye yê têkilîdaran rê ameyî şawitene. Pê xebate yeno amanckerdene ke teşxîso rew û xizmetê weşîya pawitoxe hîra bibê.

Cinîyan rê teşxîso rew û mekanîzmayê piştîdayîşî ameyî îzahkerdene

Çarçewaya bernameyî de cinîyan rê derheqê kanserê memikan û rehmî de agahîye ameye dayene. Muhîmîya teşxîsê rewî ame balantene, metodê muayeneya xo bi xo ameyî qiseykerdene. Ame îfadekerdene ke rewşanê rîskdaran de cade ganî dezgehê weşîye rê bêro muracatkerdene. Sewbîna muhîmîya werdo biweşî û cuya hereketine ser o ame vindertene.

Hetê Serekîya Daîreya Polîtîkayanê Cinîyan ra zî azadbîyayîşê cinsîyetê komelkî, şîdetê vera cinîyan û mekanîzmayê têkoşînê vera şîdetî bi hîrayî ameyî nirxnayene. Derheqê xebatan de ke hetê Merkezê Cigêrayîş û Tatbîqê Problemanê Cinîyan ê Amedî (DÎKASUM) ra yenê ramitene, agahîye ameye dayene û mekanîzma û xizmetê piştîdayîşî ke cinî eşkenê muracat bikerê, bi hîrayî ameyî resnayene.

Cinîyan waştişê xo îfade kerdî

Pêdîyayîşî de cinîyî aktîf beşdar bîyî û hem tecrubeyê xo pare kerdî hem zî derheqê taxe de waştişê xo resnayî. Cinîyan; waştişê xo yê sey rayîr, awe, konteynerê eşteyan, akerdişê kursanê meslekî û awankerdişê kooperatîfanê cinîyan ardî ziwan. Cinîyanê ke bale ante muhîmîya kooperatîfbîyayîşî ser o, îfade kerd ke nê tewir xebatî do piştî bidê serbestîya ekonomîke.

Bername, bi vilakerdişê setê hîjyenî temam bî.

 

mehmet olmez