Şaredariya Bajarê Mezin, ku 49 otobusên nû li fîloya xwe zêde kirine, ji bo zêdekirina dîtbariya jinan di qada giştî de, 12 ajokarên jin ên ku di veguhestina giştî de bo ajokar hatine wergirtin, dest bi karê xwe kirin. Ajokarên jin, yên ku digotin "Em ê tabûyan bişkînin", diyar kirin ku rûniştina jinan li ser kursiya ajotiniyê dê di qada veguhestinê de gelek tiştan biguherîne.

Şaredariya Bajarê Mezin a Amedê, bi pejirandina wekheviya zayendî di hemî qadên xizmetguzariyê de wekî prensîbeke bingehîn, gavên ku mafê kar ê jinan xurt dikin berdewam dike. Şaredariya Bajarê Mezin, ku 49 otobusên nû li fîloya xwe zêde kirine ji bo zêdekirina rehetiya di veguhestinê de û hêsankirina gihîştina nav bajêr, di vê pêvajoyê de serlêdaneke girîng jî pêk anî ku dê dîtbariya jinan di qada giştî de zêde bike.

12 ajokarên jin

Bi wesayîtên nû re, niha 12 ajokarên jin, yên ku 40 rojan perwerde dîtine, dê di veguhestina giştî ya nav bajêr de kar bikin. Beşdarbûna jinan di sektora veguhestinê de, ku bi salan e jin di wê de rastî cudakariyê tên û wekî "karê mêran" tê dîtin, dê hem mafê kar û hem jî xurtkirina wekheviya civakî û hem jî serdemeke nû di qada veguhestinê de bîne.

'Em dixwazin ji kesên dixwazin vî karî bikin re bibin mînak'

Ji ajokarên jin, Şenay Kurekçî, bal kişand ser ku gotina "Her derê ku destê jinan lê bigihîje, xweşik dibe" dê li qada veguhestinê jî xuya bibe û got: "Ez bawer dikim ku tengasiya trafîkê ya di bajarê me de û nêzîkatiya mirovan a li hember hev dê ji ber ku jin li ser direksiyonê ne, nermtir bibe. Ajotina otobusek 12 metreyî zehmet e, em dixwazin nîşanî her kesî bidin ku me ew zehmetî bi ser xistiye û em dixwazin ji bo her kesê ku dixwaze vî pîşeyî bike, bibin mînak."

'Dîtina jinan di her qada ku dikaribin lê bêne dîtin, me kêfxweş dike'

Bahar Aydin bal kişand ser ku pêkanîna projeyek wisa ji hêla şaredariyê ve pir girîng e û got: "Dîtina jinan di vê qadê de ji bo me pir hêja ye. Min serlêdana projeyê kir, me 40 rojan perwerde dît, ev ji bo me pir hêja bû. Mamosteyên me baldarîya pêwîst nîşanî me dan. Dîtina jinan di her qada ku dikarin lê bêne dîtin, me kêfxweş dike. Em difikirin ku em ê bibin mînak ji bo jinên din."

'Em kesên zehmetiyan bi ser dixînin'

Menekşe Şen, ku di medyaya civakî de rastî ragihandinê hatiye, diyar kir ku dema bersiv wergirtiye, şok û kêfxweşiyeke mezin jiyaye. Şen, ku diyar kir ku hestên heyecan û matmayînê tevlihev jiyaye, got: "Berê ez di sektora taybet de di beşa muhasebeyê de dixebitîm. Niha ez derbasî pîşeya bavê xwe bûm." Şen bal kişand ser ku bi beşdarbûna jinan di qada veguhestinê de, hesta empatîyê dê herî zêde pêk were û got: "Hêza empatîkirina jinan zêdetir e. Ew xwedî kapasîte ne ku ji her temen û her beşekê re bi têgihîştin nêzîk bibin. Em in kesên ku zehmetiyan bi ser dixînin, ez bawer dikim ku hejmara me dê zêde bibe."

'Ez dibêm qey ez ê karibim bi awayê herî xweş bikim'

Azîze Tekîn jî diyar kir ku dema ku wê mamostetiya beriya dibistanê dikir, wê proje dîtiye û fikirîye ku proje li gorî wê ye. Tekîn got: "Min got ez ê hebûna jinan di her qadê de piştgirî bikim û ji jinan re baweriyeke bi xwe re peyda bikim." Herwiha destnîşan kir ku jin êdî dikarin di her qadê de bi serbestî bixebitin û serî li hemberî serweriya mêran natewînin. Tekîn got: "Hebûna jinan di her qadê de ji bo me kêfxweşiyeke mezin e. Ez vê projeyê piştgirî dikim û dibêm qey ez ê karibim wê bi awayê herî xweş bikim."

'Em li vir in ji bo ku tabûyan bişikînin'

Gulten Sulucan jî, ku diyar kir pîşeya wê ya sereke mamostetî ye, mîna jinên din diyar kir ku wê proje di medyaya civakî de dîtiye. Sulucan got: "Ez mezina 8 xwişk û birayan im, heya niha her tim bi zehmetiyan re rû bi rû mame. Li gel zehmetiyên jinbûnê, zehmetiyên jiyana li gund cuda ne." û gotinên xwe wiha domand: "Em li vir in ji bo ku hemî tabûyan bişkînin. Em jin dixwazin di her qadê de hebin, em neçar in ku di van qadan de berxwedanê bikin."

'Pêvajoyên perwerdehiya me pir xweş derbas bûn'

Rojdan Sari, ku got her roj ji ber deriyê şaredariyê re derbas dibû û proje li ser billboardên li pêşiya şaredariyê dîtibû, diyar kir ku wê bi gotina "Ez ê vî karî bikim" serlêdana projeyê kiriye. Sari diyar kir: "Pir xweş jî bû, pêvajoyên perwerdehiya me pir xweş derbas bûn."