Serra Bucak, Hevseroka Şaredariya Bajarê Mezin a Amedê, bi 10 xwendekarên ku di ezmûna Lîseyê (LGS) de puanên tam girtine û di seranserê Tirkiyeyê de bûne yekem, û malbatên wan re civiya û got ku xwendekar wê Amedê bi awayê herî baş temsîl bikin.

Ji bo ku serkeftinê xelat bike û teşwîq bike, Serokatiya Daîreya Xizmetên Civakî ji bo 10 xwendekarên Amedî yên ku di LGS’ê de bi ser ketine, çalakiyek li dar xist. Li Navenda Çand û Kongreyê ya Çand Amedê, 10 xwendekarên Amedî yên ku di LGS’ê de 500 puanên tam girtibûn û li Tirkiyeyê bûbûn yekem, bi malbatên xwe re beşdarî vê çalakiyê bûn.

Hevşaredar Bucak: Parvekirina vê bextewariyê bi me re pir bi wate ye

Di çalakiyê de, Hevseroka Şaredariya Bajarê Mezin Serra Bucak bi xwendekar û malbatên wan re civiya û bi silavkirina xwendekar, malbat û mamosteyan dest bi axaftina xwe kir. Bucak anî ziman ku ew kêfxweş e ku bi wan re ye û got ku xwendekaran tiştek pir hêja û girîng bi dest xistine.

Bucak wiha axivî: “Ali Zerdeşt Yeşîlordek, Bahoz Şerzan Kahraman, Açelya Dagtan, Mona Jiyanda Şengul, Civan Şukru Akay, Alî Emir Çelîk, Jêhat Firat Aslan, Elîf Naz Durap, Omer Arcan, Muhammed Yusuf Yigit. Ez hemûyan ji dil pîroz dikim. Tenê hevalê we Muhammed Yusuf Yigit îro li vir nîne, ew li derveyî bajêr e. Lê pir xweş û bi wate ye ku em hemû li vir in û hûn vê bextewariyê bi me re parve dikin.”

‘Wê Amedê bi awayê herî baş temsîl bikin’

Hevseroka Şaredariyê Bucak der barê xwendekarên ku li Tirkiyeyê bûne yekem de got, “Her yek ji wan li dibistanên pir xweş hatin qeydkirin. Hinek ji wan ji hêlîna xwe difirin. Lê ne xemgîn in. Nemaze dayik û bavên wan. Ji ber ku bi rastî wan careke din xwe bi cî anîne, wek xwendekarên lîseyê berê xwe dane serdema ciwaniya xwe û bi wê hişmendî û têgihîştinê, ew ê hem bajarê xwe Amedê bi awayê herî baş temsîl bikin, hem jî ji hevalên xwe re bibêjin Amed çiqas bajarekî bedew, kevnar e û çiqas xwedî erdnîgarî û çandeke xweş e. Ji ber vê yekê, hin hevalên me hene ku li Stenbolê û li dibistanên din, di şert û mercên wargehê de, wê li ser lingên xwe bisekinin û jiyana xwe bidomînin. Em hêz û şansek ji we zêdetir ji wan re dixwazin. Bê guman hûn ji me çêtir dizanin ku divê hûn ji zarokên xwe bawer bikin. Riya hemûyan vekirî be.”

‘Bala xwe bidinê ku hûn bibin ciwanên hemçax û pêşketî’

Hevseroka Şaredariyê Bucak anî ziman ku divê xwendekar bala xwe bidin ser ku bibin ciwanên azad, demokratîk û hemçax ku xwe pêş bixin û axaftina xwe wiha domand: “Ez bawer dikim ku em ê li wir jî xwedî li hev derkevin û em ê 5 salên xweş û dostane derbas bikin. Ez ji we re 5 salên pir xweş dixwazim. Pêşiya we vekirî be. Lê ya herî girîng, bajarê xwe ji bîr nekin. Çanda xwe ya ku dema hûn ji vir diçin, bi dest xistine, ji bîr nekin. Bedewî û wateya navê xwe ji bîr nekin. Wê bi xwe re bibin cihê ku hûn diçin û bala xwe bidên ku hûn bibin ciwanên azad, demokratîk û hemçax ku xwe pêş bixin. Em pir kêfxweş bûn ku me hûn li vir mêvan kirin. Pêşwaziya we gelek xweş bû. Gelek spas. Bê guman, tu carî ked û hewldana dê û bavê xwe ji bîr nekin. Wan salekê bi dil û can piştgirî da we. Wan zordarî û kêfên we kişandin. Wan zor dan we û zehmetî kişandin, lê dawiya wê xweş bû. Ez we hemûyan pîroz dikim û serkeftinê ji we re dixwazim.”

Ji her xwendekarekî re 20 hezar TL xelata serkeftinê hat dayîn

Hevseroka Şaredariyê Bucak bi Hevberdevkên Meclisa Şaredariya Bajarê Mezin Demet Ceylan û Ayhan Karatekin û Alîkara Sekreterê Giştî Zerin Turk re, ji her xwendekarekî re 20 hezar TL xelata serkeftinê dan û pirtûk jî diyarî xwendekar û malbatên wan hatin kirin.