Bismil Taxa Kooperatîfan de torra kanalîzasyonî 5 kîlometre ame hîrakerdiş
Mudirîya Pêroyî ya DÎSKÎ ya Şaredarîya Amedî ya Şaristanê Girdî, kuçeyê mîyanênî dekerdî zî xebata binawanîya kanalîzasyonî ya Taxa Kooperatîfan a qezaya Bismilî û dergîya şebekeya plankerde 10 hezar metreyan ra vete 15 hezar metreyan.
Mudirîya Pêroyî ya Îdareyê Awe û Kanalîzasyonê Amedî (DÎSKÎ), bi amancê ke Taxa Kooperatîfan ke warê berpirsîyarîya Mudirîya Şûbeyê Bismilî de ya, pêro bireso binawanîya kanalîzasyonî, xebatanê xo dewam kena. Projeyî de ke do teqrîben hezar keyeyan û nufusê 4 hezar û 500 kesan rê xizmet bido, goreyê etudanê warî û analîzanê hewceyîye çarçewa ame hîrakerdiş.
Projeyî de ke aşma gulane de dest pêkerd, şebekeya kanalîzasyonî ke daraxê verênî de 10 hezar metreyî ameybî plankerdiş, bi girewtişê kuçeyanê mîyanênan ê bernameyê xebate, bî 15 hezar metreyan. Bi projeya ke newe ra ame serûberkerdiş, yeno amanckerdiş ke tehlîyeya awa lêmine bireso heme kuçeyanê taxe û talûkeyê laser û eştişê awe yê ke xetan ra vejîyenê bêrê wedardiş.
Heta ewro teqrîben 3 hezar metre xeta arêkerdoxe ya sereke û 466 metre xeta girêdayîşê kuçeyanê mîyanênan ameye ronayîş. Çarçewaya projeyî de plan bî ke hezar û 12 locinê muayene bêrê viraştiş; nînan ra 115 temam bîyî.
'Ma sîstem seba emrêko derg proje kerd'
Serekê Daîreya Herêma 1. ya DÎSKÎ Abbas Aslanî agahî daye ke netîceya etudanê warî de çarçewaya projeyî hîra kerda, bi hewayêk ke Taxa Kooperatîfan pêro bigîro xo mîyan. Aslanî wina vat: "Binawanîya kanalîzasyonî ke nêaseno zî xizmetanê şaredarîye yê bingeyinan ra yew o ke rasterast qalîteya cuye ser o tesîr keno. Ma sîstemo ke Taxa Kooperatîfan de awan kerd, proje kerd ke emrêko derg de û bi hewayêko domdar xizmet bido. Ma seranserê Amedî de mabênê taxanê merkez û dewan de seypêkerdişê standardê xizmetî sey amancanê xo yê verênan ra yew vînenê."