Mudirîya Pêroyî ya DÎSKÎ, bi amancê ke hewceyîya awa şimitişî ya merkezê qezaya Pîranî ke bi serranê dergan vila bena, bêro temînkerdiş, merkezêkê terfî yo newe û tesîsê awguznayîşî awan kena.

Çarçewaya projeyî de tesîsê awguznayîşî yê pakête yê bi kapasîteya 50 lître/sanîye û 5 hezar û 508 metre xeta terfî û 954 metre xeta îsale yenê viraştiş.

Xebatê xeta terfî resayî se ra 90; wexto ke proje temam bibo, rêjeya awe ke qeza rê yeno dayîş, sanîye de 30 lîtreyan ra do vejîyo 50 lîtreyan.

Bi sîstemî ke Awbendê Pîranî do bibo çimeyê awa şimitişî yo newe, merkezê qeza rê do awa şimitişî ya bêvindertiş, biemnîyet û eynî standardê qalîteyî de awguznaye bêra temînkerdiş.

Bi sermîyangozarî, hewceyîyanê ewroyî ra teber yeno amanckerdiş ke waştişê awe yê nufusî ke demê ameyoxî de do zêde bibo zî bêro temînkerdiş.