Hemşaredara Şaredarîya Şaristanê Pîlî Serra Bucaka ke Konferansa Pêroyî ya Tora Şaredaranê Seba Haştîye de pêşkêşî kerde, îfade kerd ke vera polîtîkayan ke serran reyde bi pêrodayîş û tadayîyan şekil girewto, înan pêro waran de awankerdişê haştîye sey qaydeyêko bingeyî qebul kerdo.

Hemşaredara Şaredarîya Şaristanê Pîlî ya Amedî Serra Bucak, mîyanê tarîxanê 7-10 Tebaxe de şaristanê Nagazakî yê Japonya de beşdarê Konferansa Pêroyî ya Tora Şaredaranê Seba Haştîye bîye û " Roniştişê aktîvîteyanê kultur, huner, mûzîk û sporî" de qisey kerd.

Rojê dîyin ê konferansî, bi vîrardişê seate 11.02yî ke bomba atomî erzîyaybî bi Nagazakî dest pêkerd. Vîrardişî ra dima çarçiwa konferansî de beşdarî bîy 5 kome,  beşdaran komanê xo de behsê xebatanê kulturî û komelkîyan ê şaredarîyanê xo û şaristan û komelî ser o tesîrê nê xebatan kerd. Şaredara Amedî reyde şaredaranê Malakoff, Hirakata, Hiroşima, Musmshino, Fuchu-cho, Fuchu, Taku pêşkêşî kerdî.

Konferansî de nameyê ŞŞPA ser o Hemşaredara Şaredarîya Şaristanê Pîlî Serra Bucak pêşkêşî kerde, bi qeseyanê "Ez bi tesmsîlê Amedo ke bi tarîxê xo yê hezar serran, bi erdê xo yê hîrûbereketin û bi mîrasê kulturî yê bêhempayî êno şinasnayene tîya ya.” dest pêkerd.

'Senînîya mîrasêkê unîversalî xo de kirişeno'

Hemşaredar Bucak bal anit ser ke Amed de 8 hezar serran ra bîyo bêvindertiş ziraet êno kerdene û Amed yew şaristano qedîm o ke bîyo mazubanê xeylê medenîyetanê cîyayan.Reyna Bucake ard ra vîrî ke  Sûrî û Baxçeyê Hewselî lîsteya Mîrasê Kulturî yê Dinya ya UNESCOyî de ca gênê û va ke "Amed bi sûranê xo yê ke teqrîben 7 hezar serran ra bîyo pay ra yê senînîya mîrasêkê unîversalî xo de kirişeno.”

'Ma Ganî Hemkarîyanê Vera Şerî Xurttir Bikerîme'

Konferansî de Hemşaredare Bucak lanet ard bi galkerdişê teberê merdimîye ke  Hiroşîma û Nagazakî de qewemîyaybî û êyê ke nê galkerdişî de canê xo dayo bi hurmet yad kerdî û va "Seba ke no feleketo winasî tarîxê merdimîye de reyna meqewîyo, ma ganî piştîyewbînandayîşê vera şerî û çekanê nukleeran pêt bikerîme, naye ra ez nê pêserameyîşê ma zaf bierc vînena.”

'Pêro Xebatanê Xo de Ma Haştîye Gênîme Vernîye'

Hemşaredare Bucak neqil kerd ke Şaredarîye pêro xebatanê xo de polîtîkayanê ke haştîye gêna vernî aver berdê û tetbîq kerdê û bi nê awayî qiseya xo dewam kerde:

"Awankerdişê haştîya komelkî de; bi ferasetê yew îdareyê herêmî yo ke zaf-ziwanî yo, azadîya cinîyan paweno, zaf-kulturî yo û cîyayîyan gêno xo virare xebatanê xo dewam kenîme. Vera polîtîkayan ke serran reyde bi pêrodayîş û tadayîyan şekil girewto, şaredarîya ma biqerar helwestê xo yo ke hetê haştîye de yo dewam kena û warê kulturî de awankerdişê haştîye sey qaydeyêko bingeyî qebul kerdo. Naye ra serkewte kreşê ma yê ke bi ziwananê  kurmanckî, zazakî, tirkî û înglîzkî xizmete danê, merkezê ciwîyayîşê cinîyanê ke reyna eynî ziwanan de faalîyetê xo ramenê est ê. Û sey îlave ma xebatanê xo yê kultur-hunerî de ziwananê kêmnetewan sey ermenîkî û suryankî  xebetnenîme ke înan biderîme ciwîyayene.