Şaredarîya Amedî ya Bajarê Girdî, Aşxaneyê Şarî ke qeza Baxlarî de seba werdê pak, weş û erjan pêşkêş biko, akerd û şarê ke ey ra îstîfade keno, kêfweşîya xo îfade kerd û va "Seba şarî, feqîran, teqawutan, wendekar û esnafan çîyêko zaf weş o."

Şaredarîya Amedî ya Bajarê Girdî, goreyê fehmê şaredarîya sosyalî şûbeyê xo yo verên 29ê Tebaxe de Kuçeyê Hunerî yê Taxa Kooperatîfan a Qeza Yenîşehîrî de akerd û şûbeyê xo yo dîyin zî 11ê Teşrîna Peyêne de Kuçeyê Emegî ya Taxa Mewlana Xalid a Qeza Baxlarî de akerd.

Aşxaneyê Şarî ameyo akerdiş ke seba ke şarî rê werdê erjan, pak, weş û ewle pêşkêş biko, roja yewşemeyî ra teber her roje saete 12.00-18.00 xizmet dano. Aşxaneyê Şarî ke bitaybetî seba şarê ke ameyeyê înan kêmî yo û wendekarî sey grûba hedefe ameyo fikirîyayîş, her şûbeyê ci, bi 4 tewir werdan rojane hezar kesan rê xizmet dano. Şaredarîya Bajarê Girdî, seba ke hûmara Aşxaneyanê Şarî ke şar eleqeyêko pîl mojneno zêde biko, do xebatanê xo dewam biko. Şarê ke Aşxaneyê Şarî yê Kuçeyê Emegî ra îstîfade keno, seba feqîran sey xizmetêko "weş" nirxna.

'Çîyêko zaf weş o'

Abdulqadir Atliyî ra şarî ke ameyo aşxane, kêfweşîya xo ya nê xizmetî îfade kerd û nê çîyî qeyd kerdî: "Sey yew esnafî seba ma çîyêko weş bi. Şar normalî de teber şino 300-350 lîre werd weno û tîya yeno 70 TL werd weno. No çîyêko zaf weş o. Hem teqawudanê ma rê hem wendekaranê ma yê normalan rê hem zî şarê ma yê normalî rê û bitaybetî esnafanê ma rê çîyêko zaf weş bi."

'Şaredarîya ma cayêko mukemmel viraşto'

Abdulmecît Tarhanî ke şarî ra yew kes o, va werdî zaf ecibnayî û fikrê xo wina îfade kerdî: "Şaredarîya ma cayêko mukemmel viraşto. Şarê Amedî feqîr o. Zafê înan nêeşkenê kar bikê. Werrekna nê tewir cayî 6-7 cayan de virazîyayênê. Mesela ofîs de yew ca est o, tîya de yew ca est o. 75 de, Dîclekentte wa nê tewir cayî zêde bibê. Werdî zaf weş bî. Homay razî bo."

'Sîstemêko zaf weş o'

Erdal Kotanî ke şarî ra yew kes o, dîyar kerd seba şarê ke seba ke werdan vayî yê nêeşkenê teber ra werd biwerê Aşxaneyê Şarî cayo mukemmel o û nê çîyî vatî: "Seba ma zaf weş bi. Sey yew karkerî hetê fîyatan ra zaf baş o, ma eşkenê zaf werd biwerê. Ma zêde mird benê. Rewşa şarê ke tîya de yo dîyar a, zaf kesî nêeşkenê teber ra werd biwerê. Werd, teber ra raşta zî zaf vay o. Yanî no yew fîyatê erjan o. Eke ma wina biewnîyê, ez vana zaf weş o, sîstemêko zaf weş o. Şar zaf fayde vîneno. Bitaybetî wa ez pîlanê ma rê vaja. Ê werdê keyeyî yo germ nêvînenê. Ez bi xo zaf kêfweş a. Ez hemşaredaranê ma û kam ke hewcedarî mojnaya înan rê yew bi yew sipas kena."

'Ma ke parçeyê nê xizmetî yê ma zaf şa yê'

Werdpewjê aşxaneyê Şarî Qasim Gozgormezî zî kêfweşîya ke şarî ra dîya îfade kerd. Qasim Gozgormezî wina qisey kerd: "Aşxaneyê Şarî rê tîya de hewcedarîyêka girde est bîye. Şar zaf kêfweş o, yeno nê xizmetî ra îstîfade keno. Bitaybetî şarê ma yo ke serê 40-50 serrî yo zaf kêfweş ê. Yenê tîya bi fîyatêko munasib, nê wextê buhranê ekonomîkî de, nê prosesî de, bi fîyatêko şenik sey 70 lîre hewcedarîya xo ya werdî, xida gênê û bi kêfweşî tîya ra şinê. Ma zî ke parçeyê nê xizmetî yê ma zaf şa yê, kêfweş ê.”