Hemşaredarê Şaredarîya Amedî ya Şaristanê Girdî Serra Bucak û Dogan Hatun, beşdarê beyanatê çapemenîye bîyî ke derheqê tepişîyayîşê Hemşaredarê Şaredarîya Kayapinarî Cengiz Dundarî de ame dayene. Hemşaredare Bucak va ke ganî tetbîqê qeyyûmî ra fek bêro veradayene û wina va: " Şima mecbur ê ke îradeyê şarî rê hurmet bikerê."

Vera awanîya şîaredarîye de derheqê tepişîyayîşê Hemşaredarê Şaredarîya Kayapinarî Cengiz Dundarî de beyanatê çapemenîye ame dayene. Beyanatê çapemenîye de Hemşaredarê Şaredarîya Şaristanê Girdî Serra Bucak û Dogan Hatun, Hemşaredara Şaredarîya Kayapinarî Berivan Gulşen Sincar, endamê meclîsî, temsîlkarê partîyanê sîyasîyan û rêxistinanê komelê sivîlî beşdar bîyî.

Hemşaredara Şaredarîya Kayapinarî Sincar ard vîrê şarî ke Colemêrg, Mêrdîn, Batman, Xelfetî, Esenyurt, Dêrsim, Pulur û Bahçsaray de qeyyûm ameyo tayînkerdene û va: "Ma wazenê ke tîya de reyna helwestê ke vera îradeyê şarê ma yê, protesto bikê."

Hemşaredare Bucak: No îrade, îradeyê şarî yo

Hemşaredare Bucak ke beyanatê çapemenîye de qisey kerd, selam da beşdaran û va ke ê hemşaredarê weçînîyayeyî û endamê meclîsî yê Şaredarîya Kayapinarî reyde pîya yê. Bucak ard vîrê şarî ke Hemşaredarê weçînîyaye Cengiz Dundar mîyanê înan de çin o la o Hemşaredarê Şaredarîya Kayapinarî yo û bi îradeyê şarî ameyo weçînayene û wina dewam kerd: "Ma nêwazenê ke fek ney ra vera bidê. Çunke no îrade, îradeyê şarî yo û şima mecbur ê ke hurmet bikerê ney rê. Ma wexto ke behsê tahrîbatê 8 serranê qeyyûmî kenê, ma behsê îdareyê şaredarîya weçînîyaye yê 8 aşman zî kenê. Ê mojnenê ke nê 8 aşmî senî yew têkoşîno şerefdar bî. Ganî ê kesê ke hêvîya xo sistemê qeyyûmî ra girê daya, tîya ra dersêk bigîrê."

'Ganî dest ra tetbîqê qeyyûmî bêro wedartene'

Bucak va ke seba demokrasîya welatî zaf xemgînker û endîşeker o ke yew şaredarî Awanîya xo ser o pankarta bileqno û vajo "Ma bi weçînayîşî ameyê, ma bi qeyyûmî nêşonê" û wina dewam kerd: "Hewcedarîya pîyabîyayîşê şaran est û nê îfadeyî ser o darbe kenê, ganî fek ney ra bi lezabez bêro verdaneye."

'Şaredarîyê ma xebitîyenê ke tahrîbatan wedarê'

Hemşaredare Bucak va: "Ma her tim va û nika zî vanê ke qederê ma û qederê heme şaranê Tirkîya muşterek o; aştî, wekhevî û azadîye ra vîyareno" û wina dewam kerd: "Embazê ma 8 aşmî yo ke heme şaredarîyanê ma de ke qeyyûm ameyo tayînkerdene, xebitîyenê ke tahrîbatê 8 serran wedarê. Şima naye zî nêvînenê? Netîce, 8 aşmî yo şima çi mufetîşî ke est ê, şawitê. Eslê xo de no hukmat netîce zaf weş zano. Ma va 'Bêrê, bi çimanê xo bivînê çi dizîyayo', ma veng da şima, ma eşkera veng da, ma dadgerî rê xebere daye. Vengê ma nêresa dezgehanê hukmatî. Dezgehê hukmatî tena taqîbê ferasetê ke wazenê şaran pê bidê kiştiş û hemşaredarê ma bi dewayanê komployî tepişnenê. Şima dewayanê hemşaredaranê ma yê 9 serran verê cû reyna vejenê meydan, şima qet şerm nêkenê?"

'Ma do hîna zaf vengê xo berz bikê’

Hemşaredare Bucak va ke ê do dewam bikerê ke vera tetbîqê qeyyûmî helwestê xo nîşan bidê û wina qedêna: "Hemşaredarê ma, heme embazê ma yê weçînîyayeyî şerefê ma yê, sey heme şaranê ma yê ke seba nê îradyîe xover danê, têkoşîn kenê. No têkoşîno şerefdar înan emanetê ma kerdo, tena ê eşkenê ma ra bigîrê. Ma weçînîyayeyê nê şarî yê. Ma do helwestê xo yê demokratîkî qadan ra îfade bikê. Ma do hîna zaf bêrê têhet û hîna zaf vengê xo berz bikê. Ma Anqara ra heta Qers do nêvindê ke nê têkoşînê heqdarî gird bikê."