Mudirîya Pêroyî ya DÎSKÎ ya Şaredarîya Amedî ya Şaristanê Girdî, Qezaya Bismilî de bîrê awe yo newe ke rojane 1 mîlyon û 440 hezar lître awe dano, da xebitnayîş.

Mudirîya Pêroyî ya DÎSKÎ seba ke şarê ma bieşko rehet awa pake bigîro, xebatanê xo dewam kena. DÎSKÎ na rey Qezaya Bismilî de bîrê awa şimitişî ke verê akerde bî la giredayîşê ey temam nêbîbî, da xebitnayîş. Xebata newe ke seba kêmîkerdişê problemanê awe yo ke koçê zereyî, zêdebîyayîşê nifusî û vurîyayîşê hewayî ra yeno, do rojane teqrîben 10 hezar kesan rê awa şimitişî temîn bikero.

'Ma heme kêmaneyî temam kerdî'

Personelê Teknîkî yê Şûbê DÎSKÎ yê Bismilî Caner Kaplanî derheqê bîrê awa şimitişî yê neweyî de dîyar kerd ke înan fizîbîlîte ra dima heme kêmaneyê bîrê sondajî ke verê akerde bî la nêdaybî xebitnayîş, temam kerdî.

Kaplanî îlawe kerd ke hûmara pompaya awa şimitişî bîya 9 û bîro newe do rolêko muhîm kay bikero û hetkarîya temînkerdişê awa şimitişî ya Qezaya Bismilî bikero. Kaplanî va ke bi saya bîrê neweyî yê 120 metreyî do her sanîye de 25 lître awe bireso Bismilî.

Rojane 1 mîlyon û 440 hezar lître awe do şarî rê bêro dayene

Kaplanî qeyd kerd ke ê sey Mudirîya Pêroyî ya DÎSKÎ do seba temînkerdişê awa weşe ya şarî xebatan bikerê û wina va: "Ma sey Şûbeyê Bismilî yê Mudirîya Pêroyî ya DÎSKÎ ya Şaredarîya Şaristanê Girdî, pompaya bîrê neweyî reyde hûmara pompayanê ma bîya 9. Bîro newe 120 metre xorîn o û bi hêzê 40 HP yo. Pompaya ma ya bîrî do her sanîye de 25 lître awe bido. Ma texmîn kenê ke pompaya ma ya bîrî do rojane 16 saetî bixebetîyo. Eke 16 saetî bixebetîyo do 1 mîlyon û 440 hezar lître awe bido. Eke mamqebul bikê ke rojane yew merdim 150 lître awe xebitneno, awa ke ma danê do 10 hezar şarê ma rê bes bibo. Ma sey Mudirîya Pêroyî ya DÎSKÎ do seba temînkerdişê awa weşe ya şarê ma xebatanê xo dewam bikerê."