Hemşaredarê Şaredarîya Amedî ya Şaristanê Girdî Dogan Hatun ke Bismil de muxturan reyde ame têhet û waştişê înan goşdarî kerd, va ke problemê ke înan dewe qezayan de tesbît kerdî, bi plansazîya ke ameye hazirkerdene, do heta peynîya serra 2026î çareser bikê.

Serekîya Daîreya Çapemenî Weşan û Şarî Reyra Têkilî ya Şaredarîya Şaristanê Girdî, seba zêdekerdişê beşdarîya şarî, tesbîtkerdişê hewcedarîyanê taxan û çareserî têhetameyîşanê muxtaran organîze kena û Qezaya Bismil de dewam kerd. Kombîyayîşî de ke Şaredarîya Bismil û Şantîyeya İkmalê Makîneyan de ame kerdene, Hemşaredar Dogan Hatunî reyde Hemşaredarê Şaredarîya Bismil Mîzgîn Ekîn û Guven Tanrikulu, serekê daîreyan, endamê meclîsî û muxtarî beşdar bîyî.

Hemşaredar Hatun: Yew serre de ma problemê awe çareser kerd

Kombîyayîşî de Hemşaredare Hatunî qisey kerd û va ke seba çareserîyanê daîmîyan ê problemanê awe û binawanî yê Amedî, goreyê hazirî û plansazîyan dabeş kerdî û îfade kerd ke problemê ke tesbît bîyî, na plansazîye reyde pîya do heta peynîya serra 2026î heme dewe û qezayan de çareser bikê. Hemşaredar Hatunî wina qisey kerd: "Şaristanî de binawanîya awe çin bî çunke sarmaye nêameybî abirnayene. Tena pawitiş û tamîr ney, eynî wext de sarmayeyê îlaweyî zî nêameybî abirnayene. Depoyê tesîsê pakkerdişî goreyê 1 mîlyon 350 hezar kesan ameyo viraştene. No çi mana dano? Awa pak teqrîben 350 hezar kesan rê bes nêkena. Awa yew cayî ra tirawitêne cayêko bîn, ucayî ra tirawitêne tîya û kar wina ameybî îdarekerdene. Ma hesab kerd, tayê baxçeyanê xo rê, tayî cayanê bînan rê xetanê awe ronaybî û awa nêresayêne tesîsê pakkerdişî. Yew serre de ma nê problemî çareser kerdî. Nînan ra teber erdlerzî zî xetanê ma yê %60-70an de tesîr kerd. Yew serre de xetanê awe yê binê erdî, awa varanî û kanalîzasyonî teqrîben pêro newe ra ma viraştî. Na serre goreyê serra vîyarte şar de hîşmendîya awe %70 kêm bî. Hema zî heta nika problemê awe nêqewmîya çunke ma binawanî xurt kerd."

'Ma tesîsê pakkerdişî yo newe virazenê'

Hemşaredar Hatunî qeyd kerd ke do seba şarî tesîsê pakkerdişî yo dîyin virazê û bingeyê ney do nêzdî ra bêro viraştene û va: "Nê tesîsê dîyinî reyde tewr kêmî 25 serran zafêr problemê tesîsê pakkerdişî do çareser bibo. DSÎ 8 serran de tena 8 kîlometre xete viraştbî, labelê ganî 32 kîlometre biameyêne viraştene. Ma kanalêko newe akerd û a xete resmaye şarî."

Zîyaretê Şaredarîya Bismilî

Hemşaredar Hatunî kombîyayîş ra dima Şaredarîya Bismilî zîyaret kerd û demêk Hemşaredar Mîzgîn Ekîn û Guven Tanrikuluyî reyde qisey kerd.