Hemşeredara Şaredarîya Amedî ya Şaristanê Girdî Serra Bucak, kombîyayîşê CEMR’yî de îfade kerd ke tesîrê tewr negâtîfî yê şer û prosesê Rojhelatê Mîyanênî cinî ancenê.

Kombîyayîşê Komîteya Sîyasî ya Meclîsê Şaredarî û Herêmanê Ewropa (CEMR) ke bajarê Karlsruhe yê Almanya de organîze beno û Hemşeredara Şaredarîya Amedî ya Şaristanê Girdî Serra Bucak zî beşdar bîye, dewam keno.

Hemşeredare Bucak ke delegasyonê Yewîya Şaredarîyanê Tirkîye (TBB) ya endama CEMR’yî de ca gêna, kombîyayîşî de qisey kerd û bale ant viraştişê Komîsyonê Daîmî yê Seypêyîya Cinsîyetê Komelkî yê CEMR’yî û kêmaneyanê ey ser o.

Bucake dîyar kerd ke terzê rêxistinbîyayîşê xoserê cinîyan ê ke CEMR û sazgehanê rayberîyanê herêmkîyan ê Ewropa de xebitîyenê, bes nîyê.

Bucake ke ard vîrardene ke badê ke Tirkîya yew şewe de Peymana Îstanbulî ra vejîya, cinî û gedeyî her wextî ra vêşêr bêpawitiş mendê, bale ant polîtîkayanê bêcezayî ser o ke faîlê şîdetî rê yenê tetbîqkerdene.

'Hêzo ke herêman anê pêser yew têkoşînê cinîyan o'

Hemşeredare Bucake îfade kerd ke tesîrê şer prosesê tewr negatîfî yê Rojhelatê Mîyanênî cinî ancenê û îşaret kerd ke Ewropa ra heta Rojhelatê Mîyanênî hêzo ke herêman ano pêsêr yew xetê têkoşînê azadîwazê cinîyan o. Hemşeredare Bucake ke ard vîrardene ke Tirkîya de 10 aşmanê peyênan de 300 cinî hetê camêrdan ra ameyê kiştene û seyan ra merdişê cinîyan bişik yo, va ke vera na rewşe ganî her qade de terzê rêxistinbîyayîşê xoserîya cinîyan bêro zêdekerdene.