Turnuvaya Mangala de ke hetê Şaredarîya Amedî ya Şaristanê Girdî ra ameye organîzekerdene, wendekaranê ke derece girewt, înan rê xelatê cîya-cîyayî ameyî dayene.

Hetê Serekîya Daîreya Xizmetê Ciwanî û Sporî ra seba wendekaran ke wendegehê Kayanê Aqil û Zîhnî de yê, seba ke ardimê averşîyayîşê psîkolojîk û komelkî yê domanan bikero, Turnuvaya Mangala ameye organîzekerdene. Turnuva de wendekarê ke grûba emranê cîya-cîyan ra yê, musabeqa kerd.

Heme wendekaran rê setê kayî ameyî dîyarîkerdene

Turnuva de ke 47 wendekarî beşdar bîyî heme wendekaran rê setê kayî ameyî dîyarîkerdene. Turnuva de beşdaran rê ke bî yewin, taximê eşofmanan û setê mangala, beşdaran rê ke bî dîyin, solê sporî û setê mangala, beşdaran rê ke bî hîrêyin, goga futbolî û setê mangala û beşdaran rê ke bî çarin, kulçe û setê mangala ameyî dayene.

Derecegirewtoxan rê xelatî ameyî dayene

Turnuva de Şehmus Saylano ke bî yewin, xelatê xo destê Sekreterê Pêroyî yê Şaredarîya Şaristanê Girdî Emrullah Gordukî ra, Beytullah Çavuşogluyo ke bî dîyin xelatê xo destê Hetkarê Sekreterê Pêroyî Reşat Bakanî ra girewtî. Beşdaran ra Yahya Efe Ferhanogullarîyo ke bî hîrêyin, xelatê xo destê Serekê Daîreya Ciwan û Sporî Çetîn Hasgumuşî ra girewtî û beşdaraa ra çarine Nupelda Demîrhan zî xelatê xo destê Sereka Daîreya Karê Kultur û Komelkî Zeynep Yaş ra girewtî.

"Ma do nê tewir turnuvayan rê piştî bidê"

Gorduko ke programî de qisey kerd, nê çîyî vatî: "Ez sipas kena gedeyanê ma rê ke beşdarê Turnuvaya Mangala ya ke hetê Serekîya Daîreya ma ya Ciwan û Sporî ra çarçewaya Kayanê Aqil û Zîhnî de ameye organîzekerdene, bîyî. Ez pîroz kena embazanê ma yê ke na turnuva organîze kerda. Seba ke nê tewir turnuvayî ameyoxî de zî dewam bikerê û seba ke şarî rê ardimê ciwîyayîşê plankerde û prosesê girewtişê qeraran bilez bikerê, ma do nê turnuvayan rê dima zî piştî bidê ke hetê serekîya daîreyanê ma ra do bêrê organîzekerdene."