Hemsereka Şaredarîya Şaristanê Pîlî ya Amedî Serra Bucake, Erxenî de muxtaran reyde ameye têhet û îfade kerd ke seba zêdekerdişê beşdarîya herêmî, munaqeşeyê ke do muxtaran reyde bêrê kerdene girîng ê.

Serekîya Dayîreyê Çap-Weşan û Têkilîyanê Şarî ya Şaredarîya Şaristanê Pîlî, bi ferasetê xo yo ke beşdarîya îdareyê herêmî esas gêna, muxtaran reyde têhetameyîşê xo dewam kena. Na çarçiwa de Hemsereka Şaredarîya Şaristanê Pîlî Serra Bucake, Hemsereka Şaredarîya Erxenî Birsen Azak Bayare, Hemserekê Wîlayetî ya Partîya Têduştî û Demokrasîya Şaran (DEM Partî) Abbas Şahînî de pîya, Qeza Erxenî de muxtaran reyde ameyî têhet.

'Awankerdişê demokrasîya herêmî de cayê muxtaran girîng o'

Qiseykerdişê akerdişî yê kombîyayîşo ke Salona Konferansî ya Şaredarîya Erxenî de ame serûberkerdene, Hemserekê Wîlayetî ya Partîya DEMî Abbas Şahînî kerd û bal anit ser ke prosesêkê ra yêno vîyartene ke tede siyaset zaf vurîyeno û îfade kerd ke muxtarî awankerdişê demokrasîya herêmî de paynikanê tewr girîngan ra yew ê.

Hemserek Bucake: Ma wazenîme pêşnîyazanê şima yê cîyayan zî bigoşdarîme

Hemsereka Şaredarîya Şaristanê Pîlî Serra Bucake îfade kerd ke Erxenî qezayanê Amedî yê tewr girdan ra yew o û vat ke bi girdîye problemî zî zêde benê. Hemserek Bucake bal anit ser ke problemê binawanîye, awe û rayîrî rojeva bingehîn ê qeza yê û vat "Ewro înan ra teber ma wazenîme rojevanê cîyayan de pêşnîyazanê şima yê cîyayan zî bigoşdarîme. Rojanê ke ma ameyîme weçînitene ra heta nika 16 aşmî vîyartî. Berpirsyarê xizmetanê awe, binawanîye, kanalizasyon û rayîrî yê 17 qezayan, ma yîme. Ne bûdce ne zî kapasîteya xebetkaran ê 17 qezeyan bes nêkena labelê no seba ma mane nîyo. Eke ma xebatanê xo pare kenîme yew badelê xo est o; şaredarîya ma yew waro ke şar eşkeno hesab biberso û kontrol bikero."

'Herême de beşdarîye ser o ganî munaqeşe bikerîme'

Hemserek Bucake bal anit ser ke proseso sîyasî û xerîteya rayîrî ya ke do bêrê afirnayene zî ganî weş bêrê nirxnayene û vat "Bi awanîyanê herêmî ma eşkenîme çi bikerîme, beşdarîya demokratîke senî eşkenîme bikerîme cuya rojane, nînan ser o ganî munaqeşe bikerîme."

Kombîyayîşî de muxtaran zî bi taybetî behsê problemanê binawanîye, kanalîzasyon û awe kerd.

'Ma do Erxenî reyde hîna zaf eleqedar bibîme'

Hemserek Bucake talep û pêşnîyazê muxtaran not kerdî û îfade kerd ke xebatê rayîrî yê ke muxtaran taleb kerdê, çarçiwa programê sermayegozarîya serranê 2025-2026î de do berê nirxnayene. Hemserek Bucake vat "Yew kombîyayîşo winasî bî ke ma kêmasîyê xo tespît kerdî" û soz da ke Erxenî reyde do hîna zaf eleqedar bibê.