Forumê Aştîya Komelkîye û Azadîye ke hetê Şaredarîya Amedî ya Şaristanê Girdî ra ame organîzekerdene, bi beşdarîya hîraye ya sîyasetmedar, îdarekarê herêmkîyan, rêxistinanê komelê sîvîlî û temsîlkaranê mîyanneteweyî dest pêkerd. Forumî de babetê komelkîkerdişê aştîye, çareyê demokratîkî, rolê îdareyanê herêmkîyan û çareyê meseleya kurdkî yê bi bingeyê huqûqî ameyî mişewrekerdene; polîtîkayê qeyûmî, cuya pîya û demokrasîya herêmkî ser o qisey bî.

Beşdarê akerdişê ke Salona Konferansê Alî Emîrîyî de ame viraştene, Hemşaredarê Şaredarîya Şaristanê Girdî Serra Bucak û Dogan Hatun, Hemserekê Pêroyî yê DEM Partî Tuncer Bakirhan, Hemserekê Pêroyî yê DBPyî Keskin Bayindir, endamê Meclîsê Mayanê Aştîye, sîyasetmedar Veysî Aktaş, hemşaredarê ke cayê înan de qeyûm ameyo tayînkerdene, Serekê Şaredarîya Adana yê CHPyî Zeydan Karalar, Walîyê Hewlêrî Omid Xoşnav, Walîyê Duhokî Ali Tatar, parlamanterî, û temsîlkarê rêxistinanê komelê sîvîlî bîyî.

Hemşaredare Bucak ke akerdişê forumî de qisey kerd, dîyar kerd ke sey Şaredarîya Amedî amancê înan o yo ke piştî bidê aştîya komelkîye û prosesê komela demokratîke. Bucak va: "Ma nê prosesê aştîye sey apeyşîyayîşê qeyûmanê tayînkerdeyan û agêrayîşê hemşaredarê weçînitîyan erjnenê. Ma hêvî kenê ke no bi lez bêro viraştene."

Badê qiseykerdişan, mesajê sîyasetmedaranê tepîşteyan Selahattin Demirtaş, Selçuk Mizrakli û Figene Yuksekdag, hem zî mesajê Serekê Pêroyî yê CHPyî Ozgur Ozelî û Hetkarê Serekê Pêroyî yê MHPyî Fetî Yildizî ameyî wendene. Endama Meclîsê Mayanê Aştîye Havva Kiran zî qisey kerd û seba têkoşînê hemparî veng da.

Sîyasetmedar Veysî Aktaşî bale ante ser o ke meseleya kurdkî rastê polîtîkayanê înkar û îmhayî ameya û va: "Hewcedarî est a ke cuya pîya bi bingeyê huqûq û azadîye bêra pêşkêşkerdene. Meseleya kurdkî bi prensîbanê huqûq û demokrasîye eşkena bêra çareserkerdene."

Akademîsyene Ozgur Sevgî Goral, prosesê awankerdişê aştîye sey cewabêko seba krîzan îzah kerd û dîyar kerd ke sîyaset perspektîfê rîbirîbîyayîşî vîyarteyî reyde bêro erjnayene.

Hemserekê Pêroyî yê DEM Partî Tuncer Bakirhanî dîyar kerd ke forum gamêka krîtîke de yeno viraştene û va: "Aştî seba ma hewesêko demkî nîyo; prosesêkê awankerdişê pîlî yo ke cesaret wazeno. Cinîyan ra heta ekolojî, her sername parçeyê aştî yo. Amed eynikêko gird ê welatî yo. Rayîrê aştîya menda û birûmete Amed ra vîyareno."