Hevşaredarên Bajarê Mezin, derbarê şewata li Taxa Firatê ku 4 kesan jiyana xwe ji dest dan, daxuyanî dan û kêmasiyên avahîsaziyê yên di avahiyê de hatine tespîtkirin di 9 xalan de vegotin. Herwiha hat ragihandin ku Şaredariya Bajarê Mezin derbarê mijarê de lêpirsîneke îdarî daye destpêkirin û rapora berfireh dê di rojên pêş de bê aşkerekirin.

Hevşaredarên Şaredariya Bajarê Mezin a Amedê Serra Bucak û Dogan Hatun, duh êvarê li ser şewata li Sîteya Rojava ya li Taxa Firatê ya navçeya Kayapinarê ku 3 jê zarok 4 kesan jiyana xwe ji dest dan, daxuyaniyek dan çapemeniyê. Di daxuyaniya li ber avahiya xizmeta şaredariyê de, li gel Hevşaredaran, rêveberên şaredariyê û Hevserokên Bajêr ên DEM Partiyê Abbas Şahin û Gulşen Ozer û Hevşaredarê Kayapinarê Cengiz Dundar jî amade bûn.

Hevşaredar Bucak, axaftina xwe bi sersaxiyê ji bo kesên jiyana xwe ji dest dane û şifayê ji bo birîndaran dest pê kir û got, "Serê me hemûyan sax be."

Hevşaredar Bucak: Di 5 deqeyan de gihîştin cihê bûyerê, bi 44 xebatkarên îtfaiyeyê mudaxele hat kirin

Hevşaredar Bucak diyar kir ku agahî di saet 18:08'an de gihîştiye navenda fermandariyê ya 112'an û di saet 18:11'an de jî ji aliyê navenda fermandariyê ya 112'an ve ji tîmên îtfaiyeyê yên girêdayî Şaredariya Bajarê Mezin re hatiye ragihandin. Hevşaredar Bucak, agahiya "Tîmên me di cih de piştî agahdarkirinê, di saet 18:12'an de ber bi cihê bûyerê ve ketine tevgerê û di saet 18:17'an de gihîştine cihê bûyerê. Bi 3'yê wan bi pîrken, 6 wesayîtên araroz û 44 agirkujan mudaxeleya şewatê hat kirin" parve kir. Wê her wiha got ku ji ber kêmasiya derxistina dûmanê ya ji ber teknîka çêkirina avahiyê û hebûna gazên jehrî yên di avahiyê de kom bûne, fermandarên îtfaiyeyê biryar dane ku tahliyeya avahiyê ji derve bê kirin û welatî ber bi balkonê ve hatine arastekirin.

'4 Welatiyên me Ji Ber Gaza Ku Wan Hilmişt Jiyana Xwe Ji Dest Dan'

Hevşaredar Bucak bal kişand ser wê yekê ku welatiyên ku hatine arastekirin ji balkonê bi wesayîtên îtfaiyeyê yên bi pîrken hatine tahliyekirin û wiha got: "Di heman demê de, pêlekanên di hundirê apartmanê de û korîdorên qatan jî hatin kontrolkirin û tahliyeya 21 welatiyên me yên ku di panîkê de asê mabûn, bi alîkariya amûrên helsîna hewayê yên pêlekanê hatin misogerkirin. Mixabin, tevî hemû hewlên me jî, 4 welatiyên me ji ber gaza jehrî ya ku wan hilmiştin jiyana xwe ji dest dan."

'Şewat Ji Ber Valahiya Şafta Elektrîkê Pêk Hatiye'

Hevşaredar Bucak bal kişand ser wê yekê ku agahdariya destpêkê wekî şewata malê ji navenda fermandariyê ya 112'an re hatiye ragihandin, lê dema gihîştine cihê bûyerê, derketiye holê ku şewat ne şewata malê ye, lê ji ber valahiya şafta elektrîkê şewateke tevahî avahiyê ye. Wê kêmasiyên avahîsaziyê yên di avahiyê de hatine tespîtkirin wiha rêz kir:

1.Ji qata zemînê heta qata dawîn a avahiyê, hem di korîdorên navîn de hem jî di pêlekanên agir de tu valahiya hewayê û paceyê nebûye, ev yek rê li ber derxistina dûman û germê girtiye.

2.Pergala girtina otomatîk a deriyên pêlekanên agir nebûye.

3.Di qata banî de valahiya hewayê nebûye.

4.Kabloyên elektrîkê yên ku sedema şewatê ne, di valahiya şafta elektrîkê de li ser hev kom bûne û heta banî hatine kişandin.

5.Valahiya şafta elektrîkê, tevî ku divê di her qatî de bi tevahî vekirî be, bi betonê qismî hatiye girtin û kablo ji quncikan hatine kişandin.

6.Tevî ku divê kablo kabloyên halogen-free yên neşewitî bin, kabloyên PVC yên şewitî hatine bikaranîn û kapasîteya germkirina elektrîkê ya vê kabloyê têr nekiriye.

7.Qapaxên derve yên valahiya şafta elektrîkê ji qapaxên cuda û bi hêsanî vebûyî pêk dihatin, gelek ji wan kêmas bûn û dîwar ji materyalê PVC bûn.

8.Hat tespîtkirin ku valahiya şafta elektrîkê wekî depoyê hatiye bikaranîn û tiştên cûrbecûr (çop, tûpa pîknîkê, maseya utîkirinê, erebeya pitikan hwd.) tê de hatine dagirtin û nehatine ser qata şaftê, lê li ser zemîna şaftê hatine danîn.

9.Hat tespîtkirin ku valahiya şafta elektrîkê nehatiye ser qata banî, lê li ser zemîna banî hatiye qedandin.

Hevşaredar Bucak anî ziman ku ji ber sedemên li jor hatine rêzkirin, gelek kêmasiyên li dijî Rêziknameya Parastina Avahiyan ji Agir di jimare 26735 de û Zagona Kontrola Avahiyan di jimare 4708 de hatine tespîtkirin. Her wiha Bucakê destnîşan kir ku şaredariyê derbarê mijarê de lêpirsîneke îdarî daye destpêkirin û rapora berfireh dê di rojên pêş de bi raya giştî re bê parvekirin.

Hevşaredar Bucak got ku derbarê avahîsazê avahiyê, şaredariya berpirsiyar a ku ruhsat daye û yekîneya îtfaiyeyê ya girêdayî Şaredariya Bajarê Mezin de jî lêpirsîn hatiye destpêkirin û wiha lê zêde kir: "Em soz didin ku encamên lêpirsînê dê zelal bên eşkerekirin. Serdozgeriyê derbarê rêziknameya avahiyê de lêpirsînek berfireh daye destpêkirin û yekîneya me ya îtfaiyeyê bi nivîskî û devkî îfade daye. Êşa ku me di roja Cejnê de jiyan kirin zehmet e ku bê vegotin. Em soz didin ku hemû berpirsiyar dê derkevin holê û careke din tiştekî wiha rû nede. Em sersaxiyê ji bo malbata xemgîn dixwazin."