Meclîsê Weşîye yê Konseyê Bajarî yê Dîyarbekirî, kombîyayîşê xo yo verên viraşt û rayberîya meclîsî dîyar kerd.

Konseyê Bajarî yê Dîyarbekirî ke badê tayînbîyayîşê qeyyûmî fesih bîbî û 8 serran ra dima bi ameyîşê wezîfeyî yê Hemşaredarê Amedî yê Şaristanê Girdî Serra Bucak û Dogan Hatunî reyna bî aktîf, dewam kena ke Meclîsan ronana. Badê Meclîsanê kultur û hunerî, cinîyan û astengdaran, Meclîsê Weşîye zî ame ronayene.

Meclîsê Weşîye, Kombîyayîşê xo yo Asayî yo 1. Merkezê Kultur û Kongre yê Çand Amedî de viraşt. Serekê Daîreya Karê Weşîye yê Şaredarîya Şaristanê Girdî Wahap Saçakli, xebatkarê Weşîye û temsîlkarê rêxistinanê sivîlan ke warê Weşîye de xebatan kenê beşdar bîyî. Wahap Saçakliyî qiseykerdişê xo de va ke seba ke meclîsêko winasî ronîyayo, no zaf muhîm o û sey rayberîya herêmkî ê Amedî heme çî bikerê.