Şaredarîya Amedî ya Şaristanê Girdî, seba Roşanê Ziwanê Kurdî yê 15ê Gulane Meydanê Berê Koyî de Rojê Kitaban ê Kurdî organîze kerd.

Serekîya Daîreya Xebatanê Kultur û Komelkîyan, Yewîya Weşangeranê Kurdan (YEWKURD) reyde seba Roşanê Ziwanê Kurdî yê 15ê Gulane Meydanê Berê Koyî de Rojê Kitaban ê Kurdî organîze kerd ke 6 rojî dewam kerd.

Weşangeran ra teber komele, weqf, sazgehê ziwan û kulturî û kovarê ke bi Kurdî yenê weşanayene beşdarê Rojanê Kitaban bîyî. Rojanê Kitaban de weşangeran panel û qiseykerdişê cinsîyetê komelkî û ziwanê Kurdî organîze kerdî.

25ê Gulane - 1ê Hezîrane de Rojê Kitabanê Kurdî ke ameybî akerdene, tede pêroyê Tirkîye ra Stenbol, Îzmîr, Wan, Mersîn, Mardîn, Êlih û Riha ra 33 weşangeranê Kurdan û rêxistinê komelê sivîlî 45 standî akerdî. 6 rojan de nuştoxî beşdarê qade bîyî û panelî, qiseykerdişî, goşdarîyê şîîran, çalakîyê îmza û têhetameyîşê wendoxan ameyî viraştene.

Rojê Kitaban ê Kurdî, vizêrî bi beşdarîya Nuştoxe Rojbîn Perîşan qiseykerdişê "Cinî û Roman" ra dima qedîya.