Hemşeredara Şaredarîya Amedî ya Şaristanê Girdî Serra Bucak, Sereka Şaredarîya Kolnî Henriette Reker reyde pêvînayîş kerd û dîyar kerd ke ê wazenê xebatanê cinîyan, hewayî û meseleyanê komelkîyan de xebatan hempar bikerê.

Têkilîyê Hemşeredara Şaredarîya Amedî ya Şaristanê Girdî Serra Bucake ke beşdara Kombîyayîşê Komîteya Sîyasî ya Meclîsê Şaredarî û Herêmanê Ewropa (CEMR) bîye, Almanya de dewam kenê. Bucake na çarçewa de Sereka Şaredarîya Kolnî Henriette Reker reyde pêvînayîş kerd. Hemşeredare Bucak û Reker badê ke bêçapemenîye yew pêvînayîş kerd, salona resepsîyonî de beyanat da.

Şaredarîya Kolnî reyde waştişê xebata hempare

Bucake ke Sereka Şaredarîya Kolnî Reker dawetê Amedî kerde, va ke ê wazenê Şaredarîya Kolnî reyde xebatanê cinîyan, hewayî û meseleyanê komelkîyan de xebatanê hemparan bikerê. Reker ke hedîseyê rojaneyî ser o qisey kerd mesajê piştîdayîşî dayî Hemşeredara Bucake.

Badê qiseykerdişan Bucake, Reker rê seramîko ke logoyê Şaredarîya Amedî ya Şaristanê Girdî (DBB) ser o yo û kitabêko zafziwanî yo ke tarîx û kulturê Amedî ser o yo, dîyarî kerd.

Nameyê Şaredarîya Kolnî ra zî yew xebata ke bajar tede ameyo daşinasnayîş, Bucake rê ameye dîyarîkerdene.