Li Amedê, di bin pêşengiya Meclîsa Tenduristiyê ya Konseya Bajêr de, ji bo mekanîzmaya birêvebirin û çavdêrîkirina nexşerêya têkoşîna dijî tiryakê plansazî hat kirin. Ev plansazî di çarçoveya "Xebatên Nêzîkatiya Pir-Alî di Têkoşîna Dijî Tiryakê" de pêk hat.

Navenda Çand û Kongreyê ya Çand Amedê mazûvaniya roja duyemîn a vê xebatê kir. Di xebatê de rola civaka sivîl û pisporan, pêşniyarên çareseriyê, û têkoşîna kolektîf a ku dê di vê qadê de were meşandin hatin nîqaşkirin.

Roja duyemîn bi pêşkêşiya "Nêzîkatiya siyasî, civakî û dîrokî ya madeyê" ya Berdevkên Platforma Têkoşîna Dijî Madeyên Hişbir Şiyar Be, Gulşen Demîr û Murat Kan dest pê kir. Vê pêşkêşiyê di bin moderatoriya Psîkiyatrîst Azad Dildar Gûndercî de cih girt.

Pêşkêşiya duyemîn ji aliyê Gurkan Berkcan, Midûrê Klînîka Psîkiyatriyê ya Oya Bahadir a Şaredariya Bajarê Mezin a Gazîentabê ve hat kirin. Ev klînîk di warê Tedawî û Rehabîlîtasyona Pêgirtina Madeyên Hişbir li Tirkiyeyê de mînakek baş e.

Di xebatê de pêşkêşiyên atolyeyên “Parastin/pêşîlêgirtin, tedawî, rehabîlîtasyon, kar û perwerdehiya pîşeyî” yên ku duh hatibûn lidarxistin hatin kirin. Piştre pêşniyar û rexne hatin nirxandin.

Mekanîzmaya rêveberiyê û şopandinê

Piştî nîqaşan, ji bo birêvebirin, rêvekirin û şopandina nexşerêya madeyên hişbir, mekanîzmayeke ku rêxistinên civaka sivîl, rêveberiyên herêmî û saziyên giştî tê de cih bigirin, hat plankirin.

Piştî pêşkêşiyan, atolyeyeke li ser "Alîyên civakî, psîkolojîk û avahîsazî yên tiryakê" hat lidarxistin. Di vê atolyeyê de mijarên wekî "Parastin, pêşîlêgirtin, tedawî û kar" hatin gotûbêjkirin.

Di dawiya xebatê de, ji bo mêvanan kulîlk hatin pêşkêşkirin.