Meclîsê Şaredarîya Amedî ya Şaristanê Girdî, seba ke seypêyîya cinsîyetê komelkî bêro piştîdayene û seba ke cinî heqanê xo yê huqûqî bizanê, qerar girewt dewanê merkezîyan de do perwerdeyê semînerî bêrê dayene.

Roniştişê verên ê kombîyayîşê asayî yê aşma Kanûne yê Meclîsê Şaredarîya Şaristanê Girdî bi serekîya Cagirsereka Meclîsî Evîn Yelbogayî virazîya. Kombîyayîşo ke awanîya xizmetî ya Şaredarîya Şaristanê Girdî de virazîya, endamê meclîsî beşdar bîyî.

Kombîyayîşî de ke madeyê rojeve ameyî munaqeşekerdene, raporê Komîsyonê Cinîyan ke derheqê heqanê huqûqî yê cinîyan de yê dewan de xebatanê perwerdeyî de yo, ame qiseykerdene. Meclîsî, seba ke seypêyîya cinsîyetê komelkî bêro piştîdayene, seba ke cinî heqanê xo yê huqûqî yê vera şîdetî bizanê û seba ke paştîdayîşê cinîyan bêro zêdekerdene dewan de dayîşê semîneranê perwerdeyî bi zafaneyê vengan qebul kerd.

Badê qerarî çarçeweya programî de do semînerê perwerdeyî dest pêbikê.