Şaredarîya Amedî ya Şaristanê Girdî, seba cinîyan Programê Perwerdeyê Heqanê Merdimî yê Cinîyan (KÎHEP) ke do 16 hewteyî dewam bikero, dest pêkerd.

Serekîya Daîreya Xizmetê Cinî û Keyeyî, çarçewaya kampanyaya "Vatişê Ma Nêqedîya; Ma do Pîya Şîddetî Vindarnê" de Programê Perwerdeyê Heqanê Merdimî yê Cinîyan (KÎHEP) dest pêkerd. Program ke bi hemkarîya Komela Heqanê Merdimî yê Cinîyan (KÎH) - ke seba cinîyan programê perwerdeyê heqanê merdimî yê vila û domdar virazena û tetbîq kena dest pêkerd, do hewte de reyêk û pêro pîya 16 hewteyî dewam bikero. Program ke Perwerdekara KÎHEP’î Rojda Kizgin îdare kena, bi beşdarîya 19 cinîyanê karkeran grûba 3. de qedêna.

'Cinî hîna zî vera cîyakerdişî têkoşîyenê'

Perwerdekara KÎHEP’î Rojda Kizgin derheqê tedeyîyê programê perwerdeyî de agahdarî da û dîyar kerd ke cinî û camêrdî wayîrê heqanê seyyewbînan ê û na rewşe Qanûnê Bingeyînî de garantî bîyo. Labelê hîna zî zaf qadanê ciwîyayîşî de seba cinîyan cayê ferdî nêdîyeno. Kizgin va: "Cinî hîna zî mîyanê şeklê ciwîyayîşî de ke rolê cinsîyetê komelkî dîyar kenê, mecbur manenê ke vera sinorkerdişê cinsîyetperestî û cîyakerdişî têbikoşîyê."

Kizgin va ke seba ke cinî her warî de asaye û aktîf bibê, cayê xo xurt bikerê û seypêyîya cinsîyetê komelkî bidest fînê, têkoşînêko derg lazim o û wina dewam kerd:

"Seba naye zî muhîm o ke cinî waranê neteweyî û mîyanneteweyî de heqanê xo bizanê û înan bipawê û tetbîqkerdişî reyde cinîyanê bînan reyde hemkar û vila bibê. Mîyanê hedefanê bingeyînî yê programî de zanayîşdayîşê heqanê ma yê merdimî, welatî û cinîbîyayîşî; ûrf û edet û tetbîqê rojaneyan ke ma eşkenê înan rê vajê qanûnê vatişkî, senî heqanê ma dîyar kenê, sinor kenê yan zî îhlal kenê, est ê. Program wexto ke cinîyan sey ferdî xurt keno, cayê karî, têkilîya komelkî û têkilîya keyeyî de zî do ardimê baş bikero. Parekerdiş û pê qiseykerdiş û zereyê program de xomusnayîşî reyde cinî do bieşkê mîyanê gurûban de têkilîyê xo aver berê û têhetameyîşê newe awan bikerê."

Sernameyê programî

Sernameyê ke do programê gurûbî de ca bigîrê nê yê: "Heqê Merdimî yê Cinîyan, Heqê Qanûnê Bingeyînî û Medenî, Şîddetê Vera Cinîyan û Şîddetê Mîyanê Keyeyî, Stratejîyê Vera Şîddetî, Heqê Ekonomîkî yê Cinîyan, Têkilî, Perwerdeyê Domanan o ke Rolê Cinsîyetê Komelkî Hesab Keno û Heqê Domanan, Cinî û Cinsîyet, Heqê Zîyayîşî yê Cinîyan, Cinî û Sîyaset, Femînîzm û Tevgerê Cinîyan, Organîzebîyayîşê Cinîyan."