Hemşaredarê Şaredarîya Şaristanê Pîlî ya Amedî Doğan Hatunî, semînero ke seba perwerdekaranê ke Zarokîstan de xizmetê danê ameyo serûberkerdene de qisey kerd. Hatunî îfade kerd ke xebatê warê ziwanî zaf girîng ê û xizmetê şaredarîye eşkenê zaf-ziwanî bêrê ramitene.

Mudirîya Şaxê Gedeyan ê Serekîya Dayîreyê Xizmetanê Komelkîyan, çarçiwa Programê Zarokîstan Kreş û Verê Dibistanî de yew semînerê perwerdeyê xizmet-zereyo hîra da destpêkerdene. Hemşaredarê Şaredarîya Şaristanê Pîlî Doğan Hatun, Hetkara Sekreterê Pêroyî Zerin Türk, Serekê Dayîreyê Xizmetanê Komelkîyan Ömer Saman, endamê meclîsî û zaf perwerdekarî beşdarê akerdişê semînero ke salona konferansî ya Waro Hempar ê Ciwîyayîşî yê Sümerparkî de ameyo serûberkerdene, bîy.

Serekê Dayîreyê Xizmetanê Komelkîyan Ömer Saman, derheqê falîyetanê sazgehî de zanitişî day. Samanî ard vîrî ke şaredarîye de zaf-ziwanîye 10 serran ra verî dest pêkerdîbî û vat "Amancê ma o bî ke nê xebatan biresnîme her cayê şaristanî û seba ke pêro kesê ke nê welatî de ciwîyenê cira istîfade bikerê, yew bingehêk awan bikerîme. Ma, embazanê ma yê ke newe beşdarê nê perwerdeyî bîyê reyde, nêzdîbîyayîşê awankerdişê ziwanî, gore bi paradîgmaya nê prosesî plan kerd. Ez bawer a ke seranserê 6 rojanê verê ma de yew atmosfero ke bi averşîyayîşan û munaqeşeyan pir o virazîyo.

Program bi nîşandayîşê slaytanê ke xebatanê kreşanê Zarokîstanî nawneno dewam kerd.

'Dare Rîçikê Xo, Merdim Ziwanê Xo Ser o Kesk Beno'

Hemşaredare Doğan Hatunî semîner de qisey kerd û seba xebatanê ke serran ra bîyo dewam kenê sipas kerd û vat " Dare Rîçikê Xo, Merdim Ziwanê Xo Ser o Kesk Beno.” Hemşaredar Hatunî bal anit ser ke na qisa tena bes nêkera û îfade kerd ke serrnanê peyênan de ziwanî ser o yew polîtîkaya asîmîlasyonî ya girane ameya ramitene. Hemşaredar Hatunî bal anit ser ke şar vera asîmîlasyonî xo ver dano û îfade kerd ke vera asîmîlasyonî xoverdayîş zaf çîyêko girîng o.

'Xizmetê Şaredarîye Eşkenê Zaf-Ziwanî Bêrê Ramitene'

Hemşaredare Hatun îfade kerd ke Xizmetê şaredarîye pêro waran de eşkenê zaf-ziwanî bêrê ramitene û vat "Ameyoxê gedeyan, ameyoxê ziwanî yanî rîçikê daran erdî reyde pêt beno û qet kes nê rîçikî nêeşkeno bi rehetî erd ra vejo. Çunke ma dî ke wexto ke kayyîm zî ame, înan nêeşka ke keyeyan nê berpirsîyarîye ra bitexelnê, bi zîhnîyetêko qefçil înan cehd kerd ke keyeyan nê qeydeyê bingehî ra bitexelnê, labelê vera ney xoverdayîşêko pîl ame dayene"

Hemşaredar Hatun, semînerî ra dima odayanê kayan ê gedeyan ra gêra.

Perwerdeyê do 6 Rojî Dewam Bikero

Semîner, roniştişanê perwerdeyê ke heta 16 Tebaxe dewam kene û bi sernameyanê cîyayan ameyê tertîpkerdene ra êno were. Perwerdeyî, xizmetanê komelkîyan ra heta heqanê gedeyan, perwerdeyê ziwanê maye ra heta modelanê Montessori û Reggio Emilia, yew spektrumêko hîra gênê xo ver.