Di çarçoveya çalakiyên “Bibeze, Bilîze, Parve Bike: Li Kolanê Spor” yên Şaredariya Bajarê Mezin a Amedê de, li Taxa Habeşî bi sedan zarok û ciwan hatin bal hev û rojeke tije spor, lîstik û muzîk derbas kirin.

Serokatiya Daîreya Xizmetên Ciwan û Sporê, bi germbûna hewayê dinyayê re sporê ji salon û tesîsan derdixe kolanan. Di çalakiyê de ku bi temaya “Li Her Derê Spor” hat lidarxistin, bi sedan zarok û ciwanan fersenda rojeke bi tevger di şaxên cuda yên sporê de dîtin. Ev organîzasyona ku berê li Taxa Ben û Senê ya navçeya Yenîşehîrê dest pê kiribû, vê carê li Taxa Habeşî ya navçeya Rezanê (Baglar) hat lidarxistin.

Kêfxweşiya zarokan li taxê belav bû

Bi van çalakiyên ku bi taybetî li taxên derfetên wan ên qadên sporê kêm in tên lidarxistin, tê armanckirin ku zarok bi awayekî aktîf tevli jiyana civakî bibin. Zarokên ku di nava rojê de lîstik lîstin, spor kirin û bi hev re dem derbas kirin, di taxê de dîmenên rengîn û bi tevger ava kirin. Çalakî ne tenê veguherî çalakiyeke fîzîkî; di heman demê de bû hevdîtineke ku parvekirin, bi hev re tevgerîn û piştevaniyê jî xurt dike.

Spor û şahî bi hev re bûn

Zarokên 6-14 salî û ciwanên 15-25 salî yên beşdarî şahiyê bûn; di şaxên wekî futbol, basketbol, voleybol, tenîsa masê û badmintonê de spor kirin. Di qadên spor û lîstikê yên portatîf de, enerjiya zarokan di tevahiya rojê de berdewam kir.

Di çarçoveya çalakiyê de her wiha dîwarê hilkişînê yê bi pif, trambolîn, atolyeyên lîstikên hiş û zekayê û çalakiyên rîtîm û muzîkê jî rastî eleqeyeke mezin hatin.

Zarok, ciwan û dêûbav ji çalakiyê razî ne

Di çalakiyê de ku bi sedan zarok û ciwanan fersenda naskirina şaxên cuda yên sporê dît, beşdar di nava rojê de hem spor kirin hem jî demên xweş derbas kirin. Zarok, ciwan û malbatan; kêfxweşiya xwe ya ji bo vê organîzasyona ku şahî û kelecan anî taxê anîn ziman.

Çalakî dê berdewam bikin

Serokatiya Daîreya Xizmetên Ciwan û Sporê, bi armanca ku zarok û ciwan bêtir bi sporê re mijûl bibin, dê çalakiyên “Li Kolanê Spor” di çarçoveya bernameyên diyarkirî de li taxên cuda yên bajêr bidomîne.

Werger: Omer Dilsoz