Taximê Voleybolê Cinîyanê Ciwanan ê Şaredarîya Amedî ya Şaristanê Girdî, fînal de vera Îçkalesporî serkewte vejîya û bî yewinê bajarî. Hemşaredarê Serra Bucak û Dogan Hatunî ke maç temaşe kerd, taxim pîroz kerd û kupa û madalyayî dayî.

Taximê Voleybolê Cinîyanê Ciwanan o ke binê Serekîya Daîreya Xizmetanê Ciwanî û Sporî de awan bîyo, performansêkê serkewteyî reyde dewam keno. Taximo ke Grûba A ya Cinîyanê Ciwanan de seba yewinîya bajarî 3 taximan reyde têkoşîya, 6 maçî qezenc kerdî û grûbe de bî yewin. Taxim ke sey lîderê grûbî resaybî nêmfînal, Grûba B de Taximê Lîseya Anadolî ya Fatîh Sultan Mehmetî reyde kay kerd. Taximê DBB’î rakîbê xo 3-0 zorê ci berd, resa fînal.

Taximê DBB’î, maçê fînalî de vera Îçkalesporî kay kerd. Hemşaredarê Şaredarîya Amedî ya Şaristanê Girdî Serra Bucak û Dogan Hatun, Sekreterê Pêroyî Emrullah Gorduk, serekê daîreyan û endamê meclîsî Salona Sporî ya Koşkleran de maç temaşe kerd.

Taximê DBB’î bî yewinê Amedî

Maçê fînalî de taximê DBB’î, vera Îçkalesor 3-0 qezenç kerd û bî yewinê bajarî. Taximê Voleybolê Cinîyanê Ciwanan heqê temsîlkerdişê Amedî yê herême qezenc kerd. Eke taxim maçanê herêmkîyan ra zî serkewte vejîya do şêro fînalê Tirkîye.

Hemşaredaran kupa û madalyayî dayî kaykerdoxan

Hemşaredarê Bucak û Hatunî, badê maçî cinîyê kaykerdoxî ke bîyî yewinê bajarî pîroz kerdî û kupa û madalyayî dayî înan. Hemşaredaran seba maçê ke herême de do bibê, kaykerdoxan rê serkewtiş waşt.

Hemşaredare Bucak kaykerdoxanê cinîyan reyde govende girewte.