Şaredarîya Amedî ya Şaristanê Girdî dewanê Qezaya Pîranî de seba ke pancas şarê astengdarî rehet şêrê keyeyanê xo, 2 hezar û 950 metre rayîrî ser o parke ronana.

Şefîya Xizmetanê Dewan ke girêdayeya Serekîya Daîreya Viraştişê Rayîran û Koordînasyonê Binawanî ya, bi waştişê Şaredarîya Pîranî xebata rayîrî dewam kena û seba ke şarê astengdar rehet şêrê-bêrê, parke zî dekerde mîyanê xebate.

Na çarçewa de ekîban, Dewa Çayustî de cayê Îsa Aydînê astengdarî rê hîrê metre û nêm hîrayîye û 800 metreyî dergîye de; Dewa Dogerî de Ebdurrehman Aslanî rê çar metre hîrayîye û 200 metreyî dergîye de, Gulçîçek Kaynake rê zî hîrê metre hîrayîye û 150 metreyî dergîye de; Mezraya Rezanê Dewa Dogerî de Ehmed Cengîzî rê çar metre hîrayîye û 800 metreyî dergîye de; Dewa Pinarî de Nesîm Ateşî rê zî hîrê metre hîrayîye û hezar metreyî dergîye de pêro pîya 2 hezar û 950 metre rayîrî ser o seba ronayişê parke dest bi xebate kerd.

Ekîban qismo gird yê xebata rayîran qedêna û do demêko kilm de heme xebatan temam bikê.

Badê ke rayîrê dewan temam bî, şarê astengdar do bi erebeyanê xo yê tekerlekinan yan zî akuyinan hîna rehet şêrê-bêrê.