Hemşaredare Bucak: Aştî, tena bêvengbîyayîşê çekan nîyo, prosesê awankerdişê komelkî yo
Hemşaredara Şaredarîya Amedî ya Şaristanê Girdî Serra Bucak, konferansê "Tirkîya de Prosesê Aştîya Komelkî û Nimûneyê Dinya" de va: "Aştî, tena bêvengbîyayîşê çekan nîyo, prosesê awankerdişê komelkî yo."
Bucak bale ante ser o ke bê demokrasî aştî do tena fonksîyonê agirbestî bivîno, û vurîyayîşê komelkî yo domdar pê beşdarîya tesîrdare ya îdareyanê herêmkîyan mumkun beno.
Konferanso ke hetê Şaredarîya Amedî ya Şaristanê Girdî, Şûbeyê Amedî yê ÎHD û Forumê Aştîya Komelkî û Azadîye ra ame organîzekerdene, Salona Kombîyayîşî ya Ali Emîrî de ame bicaardene. Hemşaredarê ma Serra Bucak û Dogan Hatun, Hemserekê Pêroyî yê ÎHD Cihan Aydin, parlamanterî, temsîlkarê partîyanê sîyasî û rêxistinanê komelê sîvîlî û zaf kesî beşdarê konferansî bîyî.
Bucak bale ante ser o ke îdareyê herêmkî, demokratîk û beşdarî kiştê nê nîqaşî de nîyê, tam merkezê ci de yê. Va ke aştî taxan, dewan, keye bi keye û kuçe bi kuçeyan ra awan bena.
Bucak nimûneyê Îrlandaya Vakurî û Afrîkaya Başûrî ardî vîrî û bale ante ser o ke rolê cinîyan ê prosesanê aştî de zaf muhîm o. Bucak va: "Aştîya komelkî ya domdare mana dano ke hewceyîyanê şarî rê cewab bêro dayene. Bi halê xo yê tewr sadeyî, îdareyê herêmkî yê ke şarî rê nêzdî yê û berpirsyarîya şarî yê.”
Hemserekê Pêroyî yê ÎHD Cihan Aydinî zî raporê ÎHD yê derheqê prosesê 21 aşman de pê slaytî îzah kerd û îfade kerd ke eke proses bireso amancê xo, ganî ewro sey "Roja Aştîye" bêro yadkerdene.